पद्मरत्नया नेतृत्वय् मंकाः दबूछेँ दनीगु
येँ (सन्ध्या टाइम्स)/येँया डल्लु चागलय् च्वंगु नेपालभाषा मंकाः खलःयात वःगु जग्गाय् नेवाः मंकाः दबू छेँ दयेकेगु निंतिं नेपालभाषा मंकाः खलः येँया नायः पद्मरत्न तुलाधरया अध्यक्षताय् नेवाः मंकाः दबूछेँ गुथि तदर्थ समिति म्हिगः विहिवाः गठन याःगु दु ।
नेपालभाषा ख्यःया नापं थीथी ख्यःया विशिष्ट मनूत दुथ्याकाः गठन याःगु उगु गुथिइ मुक्कं १७ म्ह दुजः दु। गुथिया सदस्य सचिवय् नेवाःतय्गु राष्ट्रिय संगठन नेवाः देय् दबूया नायः नरेश ताम्राकार च्वनादीगु दु। अथे हे सहसचिवय् प्रविणलाल श्रेष्ठ व दांभरीइ राजेन्द्रमान शाक्य च्वनादीगु दु। नेवाः मंकाः दबूछेँ गुथिया विधान बारे नं सहलह ब्याकाः तयार याःगु दुसा विधिवत रुपं नेवाः मंकाः दबूछेँ गुथि दर्ता नं यायेगु खँ म्हिगःया बैठकं निर्णय याःगु दु ।
उगु गुथिया दुजलय् मल्ल के. सुन्दर, दुर्गालाल श्रेष्ठ, सुरेन्द्रवीर मालाकार, डा. पुष्पराज राजकर्णिकार, डा. सुमित्रा मानन्धर गुरुङ, प्रा. प्रेमशान्ति तुलाधर, ई मोहनकृष्ण डंगोल, रमेशमान पिया, ई. विरेन्द्रमान शाक्य, गणेशराम लाछि, नरेशवीर शाक्य, नरेन्द्रभक्त हाडा व लजना मानन्धर च्वनादीगु दु ।
येँया चागलय् मुक्कं यानाः १ रोपनी १२ आना २ पैसा दुगु जग्गाय् नेवाः मंकाः दबूछेँ दयेकेगु ज्या आः याकनं न्ह्याकीगु खँ धाःगु दु। तर दबूछेँ गज्याःगु जुइ व उकिया डिजायन गथे च्वनी धइगु खँ धाःसा क्वःछिउगु मदुनि ।
झी कविकेशरी चित्तधर 'हृदयं' नेपालभाषा मंकाः खलःयात दान यानातःगु व लिपा मंकाः खलकं न्यानातःगु थप जग्गा मंकाः खलःया तत्कालिन पदाधिकारीत पद्मरत्न तुलाधर, दुर्गालाल श्रेष्ठ, मल्ल के. सुन्दर व काजीलाल श्रेष्ठया नामय् दर्ता यानातःगु दु ।
