कालीगण्डकीइ न्याम्ह बेपत्ता
येँ (सन्ध्या टाइम्स)/म्याग्दीया गलेश्वरं सदरमुकाम बेनीघाटपाखे वनाच्वंगु ग. १ ज १२३९ नम्बरया ट्याक्सी थौं सुथय् कालीगण्डकी खुसिइ कुतुंवनाः उकी च्वना वःपिं न्याम्ह मनू बेपत्ता जूगु दु। दुर्घटनाय् लानाः घतान गाविस वडा नं. ६ गलेश्वरया चालक बेदप्रसाद सुवेदी नापं ट्याक्सीइ च्वनावःपिं फुक्कं बेपत्ता जूगु दु। बेपत्ता जूपिं मेमेपिंत धाःसा म्हसीके मफुनि। लं थ्यंमथ्यं ५० मिटर क्वय् कालीगण्डकीइ ट्याक्सी कुतुंवंगु खःसा उकियात थ्यंमथ्यं ३०० मिटर च्वय् तक खुसिं तुं चुइका यंकूगु खः। खुसिया दथुइ हे चुइका यंकूगु ट्याक्सी थानाच्वंगुलिं उद्धार यायेत प्रहरी, सेना व रेडक्रसया मनूत थ्यनेधुंकूगु दु ।
