बलात्कृत भिक्षुणी गुम्बा वने खनीगु !
येँ (सन्ध्या टाइम्स)/पूर्वी नेपाःया संखुवासभाय् बस दुने बलात्कारया शिकार जूम्ह बौद्ध भिक्षुणीयात 'शील नष्ट' जूगु त्वहचिनाः भिक्षुणीपाखें च्युत यायेगु धकाः पिहां वःगु खँयात कयाः विश्वन्यंकं हे चर्चा जुइवं आः वय्कःयात सम्बद्ध गुम्बां हानं भिक्षुणी कथं हे दुकाइगु सम्भावना अप्वया वंगु दु ।
उम्ह भिक्षुणीयात वय्कः च्वनीगु फम्पिया कर्मा साम्तेनलिङ्ग गुम्बां 'शील नष्ट' जूगु द्वपनय् दुमकायेगु खँ पित हयेवं अमेरिका व युरोपया थीथी देशय् चायेका तःगु गुम्बातय्सं विरोध यानाहःगु खः। उमि दथुइ वय्कः भिक्षुणीयात जूगु घटना व 'शील नष्ट' या अवस्था छु खः धइगु विषययात कयाः 'शास्त्रार्थ' समेत जूगु खः। उकी मध्ये अमेरिकाया येशे चोग्याल फाउण्डेशनया संस्थापक भिक्षुणी म्याथ्यु फ्र्रेजरं फेशबुकय् मार्फत थुकिया विरुद्ध कडा टिप्पणी यासें बलात्कृत भिक्षुणीयात हानं गुम्बाय् प्रवेश याके बीत न्यंकभनं दवाव सिर्जना याकेगु अभियान हे न्ह्याकादीगु खः ।
थ्वहे झ्वलय् वय्कः भिक्षुणीयात वासः याकेत आः येँय् हःगु दु। वय्कःया उपचारय् माःगु खर्च सरकारं व्यहोरे यायेगु निर्णय नं याःगु दु। आः वय्कः अर्ध बेहोशी अवस्थाय् लानाच्वंगु दु। उखे संखुवासभाय् बलात्कार संलग्न न्याम्हेसित ज्वनाः जेल चलान याःगु दु ।
