थेच्व दुमथ्याकूगुलिं नेपाली कांग्रेसपाखें ज्ञापन
यल (सन्ध्या टाइम्स)/नकतिनि घोषणा याःगु चम्पापुर नगरपालिका दुने थेच्व गाविसयात दुमथ्याकूगु खँय् नेपाली कांग्रेस यल जिल्लां विरोध याःगु दु। यल कांग्रेसं चम्पापुर नगरपालिका दुने थेच्व गाविसयात नं दुथ्याकेमाःगु माग यासें विहीवाः स्थानीय विकास राज्यमन्त्री शत्रुघन महतोयात ज्ञापनपौ समेत बिउगु दु।
यल नेकांया कावा सभापति नवराज महतया नेतृत्वय् वंगु पुचलं उगु ज्ञापनपौ लःल्हाःगु खः। ज्ञापनपौ लःल्हाना कासें स्थानीय विकास राज्यमन्त्री महतों झिदँ न्ह्यः हे दयेकातःगु खाका अनुसार आः नगरपालिका घोषणा याःगु जुयाः उकी प्राविधिक समस्या वःगु खँयात स्वीकार यानादीगु खः। वय्कलं थुकियात कयाः याकनं हे हानं मेगु सर्वेक्षण यायेगु लागिं सरकारं छगू कार्यदल हे गठन यानाः ज्या न्ह्याकेगु आश्वासन बियादिल ।
झिदँ न्ह्यः तयार याःगु खाकाय् चम्पापुर (चापागाउँ) व थेच्वयात स्वानाः नगरपालिका घोषणा यायेगु ग्वसाः दयेकातःगु खःसां आः वयाः आकाझाकां थेच्वयात लिकयाः झरुवारासीयात जक स्वानाः नगरपालिका घोषणा याःगुलिं उकी थःपिनि आपत्ति दु धकाः नं कांग्रेस प्रतिनिधितय्सं धाःगु खः ।
चम्पापुर गाविसय् नेवाःतय् बाहुल्यता दुगु थेच्वयात मस्वाःगु खँयात कयाः पार्टीगत रुपं हे विरोध याःगु न्हापांगु पार्टी नेपाली कांग्रेस जूगु दु। मेगु पार्टीत थुकी मौन जुयाच्वंगु दु ।
