याकःचा जूवंम्ह शक्तिशाली नेता

यदि थम्हं चाहे जूसा नेपालय् हे न्ह्यागुं यायेगु शक्ति व हैसियत दुम्ह एनेकपा (माओवादी) या अध्यक्ष प्रचण्ड थौं थःगु पार्टीया थःहे कमरेडपिनि असहयोगं यानाः देश जक मखु थःगु हे पार्टी दुनेया छम्ह असहाय व निरीह नेता जूवंगु दु। अध्यक्ष प्रचण्डया हैसियतय् वःगु थ्व हिउपाः निसन्देह कारुणिक खःसा पार्टी दुने वःगु थ्व अवस्थां वय्कलं अवश्य नं छुं तःधंगु पाठ सयेका काःगु दयेमाः ।

झिंस्वद्वः मनूतय् ज्यान वंक झिदँ तक न्ह्याःगु जनयुद्धयात अविराम नेतृत्व बियादीम्ह छम्ह चमत्कारिक नेताया रुपय् प्रचण्डया छबी कायम जुयाच्वंगु खः। तत्कालिन अवस्था व जनयुद्धया माग कथं अध्यक्ष प्रचण्डयात पार्टीया सम्पूर्ण अधिकार बियातःगु खः। वय्कलं उगु अधिकार प्रयोग यानाः मुलुकयात थ्व हिउपाःया मोड तक थ्यंके हःगु खः। तर पार्टी व मुलुकयात हिलेधुंकाः नं वय्कः थः हे धाःसा हिले ल्वःमनाच्वंगु जुयाच्वन। उकिया हे लिच्वः खः, थौं वय्कःया पार्टीइ थःहे समकालीन पासापिंसं थौंकन्हय् यानाच्वंगु �विद्रोह�। वय्कःयात सदां साथ बियाच्वंपिं पासापिं हे थौं वय्कःया विपक्षी खेमाय् वनाच्वंगु धइगु वय्कःया ज्याखँयात कयाः पार्टी दुने तःधंगु हे असन्तोष ब्वलनाच्वंगुया हे स्पष्ट चिं खः। पार्टीया सम्पूर्ण अधिकार छम्ह हे मनूया ल्हातय् तया तयेगु स्वय्म पार्टी व उम्ह मनूया लागिं नं पाय्छि मखु। थज्याःगु अवस्थायात अध्यक्ष प्रचण्डं बांलाक थू हे जुइमाः। उकिं अज्याःगु खतरापाखें पार्टी, थः व मुलुकयात बचे यायेगु खःसा वय्कलं पार्टी संरचनाय् सुधार यानाः पासापिनिगु ग्वाहालि कायेगु वातावरण दयेके हे माः ।

More Stories Like this