झलनाथ खनालं ल्हाः ल्ह्वन
प्रचण्डयात धाल - बजेट पास जुइवं राजीनामा बी
येँ (सन्ध्या टाइम्स)/प्रधानमन्त्री झलनाथ खनालं थःत प्रधानमन्त्रीया कुर्सीइ फ्यतुकूम्ह माओवादी अध्यक्ष पुष्पकमल दाहाल (प्रचण्ड) समक्ष थः राजीनामा यायेत इच्छुक जुयागु बिचाः प्वंकादीगु दु ।
वंगु प्यन्हु जालय् थःत नापलाः वःम्ह माओवादी अध्यक्ष दाहालयात वय्कलं थः याकनं हे राजीनामा बीत इच्छुक जुयागु व सम्भवतः बजेट छगू संसदं पास जुइवं हे राजीनामा बीगु जुइ धकाः समेत कनादीगु खँ सीदुगु दु।
वय्कलं अध्यक्ष प्रचण्डयात बजेट लिपा थम्हं राजीनामा बीगु जूगुलिं मेम्ह मनू तयार यानादिसँ धकाः समेत आग्रह यानादीगु खँ विश्वस्त सूत्रं धाःगु दु ।
माओवादीलिसे थम्हं यानागु ७ बुँदे सहमति कथं छुं हे ज्या न्ह्याः मवंगु खँय् असन्तुष्टि प्वंकुसें वय्कलं राजीनामा यायेगु खँ प्रचण्डयात धयादीगु खः। सूत्रं धाः कथं वय्कलं 'छिकपिंसं याये धाःगु छुं हे ज्या यानामदी, थुकिं यानाः जितः म्वाः मदुगु द्वपं जक वयाच्वन' धासें थः राजीनामा बियाः पिहां वनेगु खँ धयादीगु खः। उकिया लिसलय् अध्यक्ष प्रचण्डं प्रमयात 'हथाय् चायादी मते, जिं पार्टी दुने खँ मिले यानाच्वना तिनि' धकाः आश्वासन बियादीगु खः ।
अध्यक्ष प्रचण्डं पार्टी दुने भचा कचमच पिहां वयाच्वंगुलिं थ्व खँ छक्वः मिले याये, वयां लिपा जक राजीनामा याये माली इनाप याःगु खँ नं सूत्रं धाःगु दु। सूत्रया कथं प्रम खनालं थम्हं प्रचण्डयात अथे धया छ्वयागु खँ थःगु 'किचेन क्याबिनेट'या दुजःतय्त कनेधुंकूगु दु। खनालं राजीनामा याये धाःगुलिं थ्व सरकारया डिजायन यानादीम्ह प्रचण्डयात थप संकट वःगु खँ नं सूत्रं कंगु दु ।
