माओवादीइ 'छम्ह मनू-छगू पद-छगू जिम्मेवारी'
थौं केन्द्रीय बैठक
येँ (सन्ध्या टाइम्स)/ताः ई न्ह्यःनिसें लिलिछ्याना वयाच्वंगु माओवादी केन्द्रीय कमिटीया बैठक सम्भवतः थौं सनिलय् च्वनीगु जूगु दु ।
माओवादी दुने अन्तरविरोध चर्के जुया वनाच्वंगु हे इलय् पार्टी अध्यक्ष प्रचण्डया विपक्षय् दनाच्वंपिं स्वम्ह उपाध्यक्षपिं मोहन बैद्य, डा. बाबुराम भट्टराई व नारायणकाजी श्रेष्ठ नापं फुक्क धइथें केन्द्रीय पदाधिकारीत छथाय् च्वनाः सांगठनिक संरचनाया सवालय् 'छम्ह मनू-छगू पद-छगू जिम्मेवारी' लागू यायेमाः धइगु प्रस्ताव केन्द्रीय कमिटीइ यंकेत्यंगु दु ।
माओवादीया छम्ह नेतां धयादी कथं लिपांगु इलय् माओवादी दुने ब्वलनाच्वंगु गुटबन्दीया मू कारण हे पार्टी दुने 'छम्ह व्यक्ति-छगू पद-छगू जिम्मेवारी' नीति लागू याकेगु लागिं खः। थौंकन्हय् माओवादी केन्द्रीय कमिटीइ १४० म्ह दुजः दुसां थौंकन्हय् यक्व हे केन्द्रीय नेतातय्त स्पष्ट जिम्मेवारी बिया तःगु मदु। नापं न्हापा पार्टीयात मंकाः नेतृत्वय् यंकेगु धकाः पार्टीइ स्वम्ह उपाध्यक्ष, महासचिव नापं निम्ह सचिवया समेत ब्यवस्था याःगु खःसां उकी मध्ये सुं हे पदाधिकारीयात जिम्मेवारी बिया मतःगु कारणं लिपांगु इलय् कार्यविभाजनया विषयय् पार्टी दुने बहस व्यापक जुया वःगु खँ धाःगु दु ।
थनिं दच्छि न्ह्यः हे माओवादी पार्टीयात मंकाः नेतृत्वय् यंकेगु खँ सुरु जुइधुंकूगु खः। तर पार्टी नेतृत्वं उकियात स्वीकार मयाःगु कारणं यानाः हे पार्टी दुने कचमच तच्वया वःगु खँ नं उम्ह नेतां धाःगु दु। थौंकन्हय् माओवादी पार्टीया सांगठनिक संरचना क्वय्या तह तकं स्यना वंगु अले पार्टीया कार्यकर्तात तकं झन झन निराश जुयावंगुलिं पार्टीयात ब्यवस्थित यायेत नेतात सक्रिय जुयाच्वंगु खँ नं वय्कलं कनादिल ।
