मनू स्याःगुयां १३ दँ लिपा स्याःपिं ज्वन
येँ (सन्ध्या टाइम्स)/थौंसिबें १३ दँ न्ह्यः छम्ह मनूयात स्याःगु द्वपनय् निम्ह मनूयात प्रहरीं ज्वंगु दु। जाजरकोटया पँक गाविस वडा नं. ९ लय् च्वंपिं पूर्णबहादुर रोकाय व पद्म बहादुर रोकाययात प्रहरीं ज्वंगु खः। २०५५ साल मंसीर ३ गते उगु हे गांया तिलक बहादुर बस्नेतयात उमिसं स्याःगु अभियोग उमित लानाच्वंगु खः। हत्या जूगुयां कन्हय् खुन्हु हे बस्नेतया दाजु भक्तबहादुर बस्नेतं उपिं निम्हेसिया विरुद्ध किटानी जाहेरी याःगु खः। बस्नेतयात स्याःगु इलय् २८ दँ दुम्ह पूर्णबहादुर थौंकन्हय् ४१ दँय् क्यनाच्वंगु दुसा अबलय् २५ दँ दुम्ह पद्मबहादुर थौंकन्हय् ३८ दँय् क्यनाच्वंगु दु ।
उगु घटनाय् स्वापू दुम्ह धकाः द्वपं बियातःम्ह मेम्ह छम्ह अभियुक्तयात धाःसा आः तकं ज्वने मफुनि। जाजरकोटया जिल्ला प्रहरी कार्यालयया डीएसपी ईश्वर कार्कीं अभियुक्तत पूर्णबहादुर व पद्मबहादुरयात इमिगु छेँय् हे वनाः ज्वनागु खँ धाःगु दु ।
