येँदेय् मापदण्डय् मलाक दनातःगु छेँ थुनीगु
येँ (सन्ध्या टाइम्स)/येँया थीथी लागाय् मापदण्ड दुने मलाक्क दना तःगु छेँ आः येँ महानगरपालिकां थुनीगु जूगु दु। उकिया लागिं थनिंनिसें हे अभियान न्ह्याकेगु निर्णय नं मनपां याःगु दु। वंगु असार २६ गते काठमाडौं घोषणा जारी यायेवं हे उकियात कार्यान्वयन यायेगु नामय् मनपां दकलय् न्हापां हे मापदण्ड विपरित दनातःगु छेँ निं थुनेगु धकाः ज्याझ्वः दयेकूगु खः। अथे छेँ थुनेगु ज्याया न्हापांगु चरणय् राजधानीया ठमेल, बागबजार, शंखमुल लागाय् दनातःगु च्याखा छेँ थुनेगु धकाः तयारी याना तयेधुंकूगु दु। उकी मध्ये न्हापां ठमेल व शंखमुलय् च्वंगु छेँ निं थुनेगु खँ मनपां धाःगु दु ।
येँ मनपाया प्रवक्ता ज्ञानेन्द्र कार्कीं राजधानी शहरयात सुन्दर नगरी दयेकेगु अभियानया हे छगू अंशया रुपय् अथे मिले मजुइक दना तःगु छेँ थुनेगु ज्या न्ह्याकेत्यनागु खँ कनादिल ।
येँ महानगरपालिकाय् थौंकन्हय् अथे हे १ लाख ९० द्वः खा छेँ दु। उकी मध्ये ८० प्रतिशत छेँ अनधिकृत ढंगं दनातःगु लूगु दु। अनधिकृत रुपं दनातःगु थज्याःगु छेँ थुनेगु धकाः न्हापा नं तःक्वःमछि कुतः याःगु खःसा राजनीतिक कारणं यानाः थुने मफयाच्वंगु खः ।
