धम्मावती गुरुमांया डकुमेन्ट्री विमोचन
येँ (सन्ध्या टाइम्स)/धम्मावती गुरुमांया ७८ दँ बुदिंया लसताय् 'भिं बुदिंया भिन्तुना' नांगु डकुमेन्ट्री भिक्षु कोण्डन्यं विमोचन यानाबिज्यात। धर्मकीर्ति विहारया धम्महलय् जूगु अभिधम्म पाठ ज्याझ्वलय् धम्मावती गुरुमांया ल्हाःतं 'धर्मकीर्ति भजनमाला' क्यासेट नं विमोचन जूगु खः। ज्याझ्वलय् गुरु दक्षिणाया रुपय् धम्मावती गुरुमांया भिं उसाँय् व ताःआयुया कामना यासें दोसल्लां न्ययेकेगु ज्या नं जूगु खः
।
विमोचित डकुमेन्ट्रीया च्वमि व निर्देशक प्रेमलक्ष्मी तुलाधर, रामेश्वरी महर्जन खःसा किपाकःमि अनगारिका पञ्ञावती गुरुमां खः। "भिं बुदिंया भिन्तुना" धम्मावती गुरुमांया ७७ दँ बुदिंया लसताय् लुम्बिनी उद्यानय् जूगु विशेष धार्मिक महोत्सवया ज्याझ्वःयात कयाः ३२ मिनेटयागु डकुमेन्ट्री दयेकातःगु खः। धर्मकीर्ति विहारं तयार यानाः पित बिउगु थ्व स्वंगूगु डकुमेन्ट्री खः। थ्व स्वयां न्ह्यः पूज्य महास्थवीर अश्वघोष भन्ते व धर्मकीर्ति विहार छपुलु नांगु डकुमेन्ट्री पित बीधुंकूगु दु ।
