जेल वंपिं पूर्व प्रहरीत छाय् आः तक मौन?

सुडानय् नेपाल प्रहरीया लागिं ज्या लगे मजूगु सामान न्याना छ्वःगु सम्बन्धी भ्रष्टाचारया काण्डय् लानाः न्ह्यानाच्वंगु मुद्दाय् म्हीग नेपाल प्रहरीया निवर्तमान आईजीपी रमेशचन्द ठकुरीयात नं जेल चलान यात। यद्यपि वय्कः अदालतं फ्वंगु ७ करोड तका धरौटी तयाः पिहां वयेगु तयारीइ दी। वय्कः नापं थ्व काण्डय् जेल चलान जूपिं प्रहरी अधिकृततय् ल्याः न्याम्ह थ्यंगु दु। न्यने दु कथं ठकुरीयात थ्वहे काण्डय् लाकाः जेलय् तइगु सम्भावना खंकाः हे सरकारं वय्कःयात प्रहरी सेवां चीकाः उकिया हे बराबरी जुइगु प्रधानमन्त्रीया सुरक्षा सल्लाहकारय् नियुक्त याःगु खः ।

सुडान घोटाला करोडौं तका उखेथुखे जूगु काण्ड खः। थ्व प्रकरणय् अख्तियारं ३७ म्ह पुलांपिं व वहालवाला प्रहरी अधिकारीतय् विरुद्ध मुद्दा दायर याःगु दु। मुद्दा लाःपिं फुक्क हे प्रहरी अधिकारीतय्सं थःपिं निर्दोष खः धायेगु यानाच्वंगु दु। उलिमछि दांया घोटाला जूगु स्वयेबलय् थुकिया मुख्य कसुरदार उपिं हे जक जुइ धकाः पत्याः यायेगु थाय् नं मदु। तर तत्कालिन प्रहरी महानिरीक्षक हे थुकिया मुख्य कसुरदार मखुसा कसुरदार सु ले? थ्व खँ आः तकं पिहां वःगु मदुनि। थ्व ज्याय् तत्कालिन गृहमन्त्रीतय् ल्हाः दु धइगु खँ नं पिहां वयाच्वंगु दु। तर उकिया बारे सुनां हे न्ववानाच्वंगु मदु। आः मुद्दा लाःपिं प्रहरी अधिकृततय्सं छाय् थुकिया बारे न्वमवाःगु? गनं उकिया लिउने नं हानं मेगु हे 'कासा' जुयाच्वंगु जकं दुगु ला? यदि सत्य खँ जनताया न्ह्यःने हयेगु खःसा अले थःत निर्दोष साबित यायेगु खःसा 'अभियुक्त' ठहर जूपिं प्रहरीतय्सं म्हुतुप्वाः चायेके हे माः। मखुसा दण्ड स्वीकार यायेमाः ।

More Stories Like this