परिषदं यानाः किपू नगरपालिकाय् गोलमाल

श्रीकृष्ण महर्जनपाखें

थ्यंमथ्यं झिंन्यान्हु न्ह्यः जूगु किपू नगरपालिकाया १६ क्वःगु नगरपरिषद् निर्णय याःगु विषययात कयाः नगरपालिकाय् गोलमाल जूगु दु । नगरपरिषद्ं नगरपालिकाया फुक्क कथंया ज्या अनुगमन यायेगु नितिं शक्तिशाली नागरिक समिति दयेकेगु धकाः निर्णया याःगु खःसा आः तक नं उगु निर्णय कार्यान्वन यायेगु ज्या जूगु मदुनि । उलि जक मखु नगरपरिषदं निर्णय याःगु खँ निर्णय पुस्तिकाय् आः तक नं च्वयेगु ज्या जूगु मदुनि ल्हाःचिं तयेगु ज्या तकं जूगु मदुनि । नगरपरिषद् जुइ धुंकाः आः तक नं नगरपालिकाय् दुथ्यानाच्वंगु दलतय्गु नत मुँज्या हे च्वंगु दु नत नगरपरिषद्या निर्णय कार्यान्वय गुगु कथं यायेगु धैगु विषयसं सहलह ब्याकेगु ज्या जूगु दु ? दलया प्रतिनिधित दुथ्याःगु उगु नगरपरिषद् विशेष यानाः कर्मचारीतय्गु सेवा सुविधा कटौटि यायेगु धकाः निर्णय याःगुलिं कर्मचारीत आक्रोशित जूगु जक मखुसे आन्दोलनया तकं तयारी कथं कार्यदलया नामय् छगू कथं संघर्ष समिति तकं गठन याःगु दु ।

सानुवाबु परियारया नेतृत्वय् दयेकूगु कर्मचारीतय्गु उगु कार्यदलं वंगु मंगलवाः जक थःपिनिगु माग १५ दिनया दुने पूरा यायेमाःगु मखुसा आन्दोलन यायेगु धकाः तकं ख्याच्वः ब्यूगु दु । अथे कर्मचारीतय्सं अल्टिमेटम बिइ धकाः सीवं कार्यकारी अधिकृत विदाय् च्वनेगु ज्या तकं जूगु दु । छखे परिषद्या निर्णय कथं अनुगमन समिति हे दयेके मफयाच्वंगु मेखे कर्मचरीतय्सं आन्दोलनया ख्याच्वः बियाः पौ तकं लःल्हाये धुंकूगु अवस्था दु । नगरपालिकाय् दलिय संयन्त्रया मुँज्या मजुयाच्वंगु, नगरपरिषद्या निर्णययात निर्णय पुस्तिकाय् मच्वया च्वंगु, नागरिक अनुगमन समिति दयेकेगु ज्या जुयाः मच्वंगु, कार्यकारी अधिकृतं विदा काःगु नापं कर्मचारीतय्सं आन्दोलनया नितिं अल्टिमेटम ब्यूगुलिं थुगुसी किपू नगरपालिकाय् गोलमाल जुयाच्वंगु दु । इलय् हे समस्या समाधान याये मफत धाःसा समस्या झन झन तच्वया वनी खँय् सुयां नं निगू मत दैमखु ।