'प्रधानमन्त्रीया लोभ त्वःताः वर्तमान सरकारय् हे वनेमाः’
येँ (झीगु स्वनिगः)
ब्यवस्थापिका संसदया प्रमुख प्रतिपक्ष नेपाली कांग्रेसया बरिष्ठ नेता शेरबहादुर देउवा व संसदीय दलया नेता रामचन्द्र पौडेल भावी प्रधानमन्त्री जुइगु नितिं पार्टी दुने गुटबन्दी यानाः न्ह्याः वनाच्वंगु इलय् मदुम्ह पार्टीया सभापति गिरिजाप्रसाद कोइरालाया म्ह्याय् केन्द्रीय नेतृ सुजाता कोइरालां धाःसा प्रधानमन्त्री जुइगु लोभ त्वःताः वर्तमान झलनाथ खनालया नेतृत्वय् दुगु सरकारय् हे वनेमाः धकाः धयादीगु दु । म्हिगः बुधवाः येँय् जूगु छगू साक्षात्कार ज्याझ्वलय् न्वंवायेगु झ्वलय् वय्कलं अथे धयादीगु खः । नेतृ कोइरालां आःया अवस्थाय् बांबांलाःगु मन्त्रालय कयाः कांग्रेस सरकारय् दुहां वनेमाः धकाः बह बियादीगु खः । वय्कलं राष्ट्रिय सहमतिया माध्यमं न्ह्याः वनेमाःगु थौंया आवश्यकता खः धयादिसें आः कांग्रेस नं सरकारय् वन धाःसा राष्ट्रिय सहमतिया नितिं अःपुइ धकाः नं स्पष्ट यानादीगु दु ।
वय्कलं धयादिल 'माओवादी व एमाले छथाय् हे वयाच्वंगु इलय् कांग्रेस सरकारय् वनेमाः ।थ्व इलय् कांग्रेस सरकारय् मवन धाःसा उकिं बांमलाःगु लिच्वः स्वयं कांग्रेसयात हे लाइ धकाः ख्याच्वः बियादिसें कांग्रेसया नेतृ कोइरालां शान्ति व संविधान निर्माणया नितिं माओवादी व एमाले जानाः दयेकातःगु सरकारय् हे कांग्रेस वनेमाः धकाः बह बियादीगु खः । दक्ले बांलाःगु खँ धैगु वर्तमान सरकारय् हे कांग्रेस नं वनेगु मखुसा माओवादीया नेतृत्वया सरकारयात जूसां कांग्रेसं समर्थन यायेमाःगु आवश्यकता दु धकाः नं धयादिल । कांग्रेस दुने संसदीय दलया नेता जुइगु नितिं नेतात ब्वाँय् जुयाः जूगु प्रशंगय् वय्कलं प्रधानमन्त्री जुइत संसदीय दलया नेता हे जुइमाः धैगु मदु धकाः नं स्पष्ट यानादिल । उखे नेपाली कांग्रेस पार्टी दुने रामचन्द्र पौडेल गुगु नं हालतय् संसदी दलया नेताया पद मत्वःतेगु अले शेरबहादुर देउवा धाःसा संसदीय दलया नेता जुइगु नितिं गुटबन्दी यानाच्वंगु दु ।
