प्रचण्ड विरुद्ध फुकं नेता छथाय्
स्वम्ह उपाध्यक्ष व महासचिव धोबिघाटय् बैठकय् व्यस्त
येँ (सन्ध्या टाइम्स)/माओवादी दुनेया लाइन संघर्ष तच्वया वनाच्वंगु झ्वलय् आः पार्टी अध्यक्ष प्रचण्ड छम्ह जक छथाय् व मेगु बाँकी केन्द्रीय पदाधिकारी फुक्क छथाय् जुयाः न्हूगु कथंया ध्रुवीकरण खने दया बिउगु दु ।
यलया घोबिघाटस्थित सिद्धार्थ कटेजय् माओवादी उपाध्यक्षपिं मोहन बैद्य, डा. बाबुराम भट्टराई, नारायणकाजी श्रेष्ठ, महासचिव रामबहादुर थापा बादल सहितया गोप्य बैठक च्वंगु दु। उगु बैठकय् नेपाल कम्यनिष्ट पार्टीया संस्थापकत मध्ये आः तक ल्यं दनिम्ह छम्ह जक नेता नरबहादुर कर्माचार्य तकं सहभागी जुयादीगु खः। सचिव सीपी गजुरेल न्हापांनिसें हे बैद्यया पक्षय् दुम्ह खः ।
उकिं आः माओवादीया हाइकमाण्डंनिसें केन्द्रीय पदाधिकारीत फुक्क हे धइथें अध्यक्ष प्रचण्ड विरुद्धया मोर्चाबन्दीइ छप्पँ जूगु दु। विशेष यानाः पार्टी दुने उपाध्यक्ष बैद्य व भट्टराईपाखें कार्यविभाजनयात बः बिया वयाच्वंगु खःसा लिपांगु इलय् वयाः अध्यक्ष प्रचण्डं कार्यविभाजन सम्बन्धी मुद्दायात छखे तयाः मन्त्रिमण्डल हिलाबुला यायेगु नापं भदौ १४ गते तक झलनाथया सरकारयात हे ल्यंका तयेगु धकाः प्रस्ताव तःगुलिं प्रचण्ड इतर नेतात फुक्कं छथाय् च्वंगु खः ।
थौं नं केन्द्रीय बैठक स्थगित
तःन्हु न्ह्यःनिसें हे गृहकार्य मगाःगुलिं धकाः स्थगित याना वयाच्वंगु माओवादीया केन्द्रीय बैठक थौं नं मजुइगु जूगु दु। नेता तोपबहादुर रायमाझीं थौं नं 'गृहकार्य मगाःगुलिं' केन्द्रीय बैठक जुइमखु धयादीगु दु ।
