चलखं ल्हानाः पोखराय् निम्ह सित, नुवाकोटय् प्यम्ह बेपत्ता
येँ (सन्ध्या टाइम्स)/म्हिगः बहनीनिसें मदिक्क वयाच्वंगु वां यानाः वंगु चलखं ल्हानाः पोखराय् छगू हे परिवारया निम्ह मनू सीगु दुसा नुवाकोटय् छगू हे परिवारया प्यम्ह बेपत्ता जुयाच्वंगु दु ।
पोखराया प्रस्याङ धइगु लागाय् चलखं ल्हानाः २७ दँ दुम्ह संगिता परियार व वया म्ह्याय् झिदँ दुम्ह रितिका परियार सीगु दु। उगु चलखं ल्हानाः २० दँ दुम्ह काय रमेश परियार धाःसा घाःपाः जूगु दु। चलखं परियारया छेँ छखां ल्हाःगु खः। चान्हय् १ बजे जःलाखःलाया छेँय् च्वंगु चःबिया सेफ्टी ट्यांकी छधी हे कुतुंवयाः उपिं च्वनाच्वंगु छेँय् ल्हाः वःगु खँ स्थानीय मनूतय्सं धाःगु दु ।
परियार परिवार दछि न्ह्यःनिसें उगु छेँय् बालं च्वनाच्वंगु खः। घाःपाः जूम्ह तामाङयात चरक अस्पतालय् यंकाः वासः याकातःगु दु । उकी लानाः मदुम्ह संगिताया भाःत रामु परियार लजगाःया झ्वलय् भारतया मुम्बईलय् वनाच्वंगु दु ।
उखे नुवाकोटया नर्जामण्डप गाविस वडा नं. ५ या आलडाँडाय् नं चलखं ल्हानाः छखा हे छेँया प्यम्ह मनू बेपत्ता जूगु दु। वंगु चान्हय् चलखं ल्हानाः द्यनाच्वंपिं छेँथुवाः ३२ दँया अर्जुन तामाङ, वया कलाः ३२ दँया कालीमाया तामाङ, गुदँ दुम्ह काय झिल्के तामाङ व न्हय्दँ दुम्ह सञ्चबहादुर तामाङ बेपत्ता जुयाच्वंगु दु। बेपत्ता जूपिंत स्थानीय, प्रहरी व नेपाली सेना जानाः मालाच्वंगु दु। अर्जुनया अबु ५५ दँया बुद्धिबहादुर तामाङ व १२ दँ दुम्ह म्ह्याय् निगुणा तामाङ जःलाखःलापिंथाय् द्यंवंगु पाः लाःगुलिं उपिं धाःसा बचे जुल ।
