बलात्कृत भिक्षुणीया पक्षय्

सुनिता मानन्धर

छुं दिं न्ह्यः पूर्वी नेपाःपाखे वनाच्वंगु छगः यात्रुवाहक बसय् च्वनाः वनाच्वंम्ह छम्ह बौद्ध भिक्षुणीयात बलात्कार यायेगु थेंज्याःगु घृणित ज्या जूगु बुखँ ब्वने माल। थ्व बौद्ध जगत जक मखु मुक्कं नेपाःयात हे आघात लाकीगु बुखँ खः। उगु घटनायात कयाः हाकनं नानाकथंया खँत नं पिहां वयाच्वंगु खनेदु। गुलिसिनं उम्ह भिक्षुणीयात अपवित्रया संज्ञा बियाच्वंगु दुसा गुलिसिनं वय्कःयात चीवर त्वकेमाःगु खँ नं पित हयाच्वंगु दु। तर छु धाथें उगु घटना लिपा आः बुद्ध शासनय् वय्कःया थाय् मदुगु हे खः ला? थौं थ्व खँ त्याजिक थुइका काये माःगु दु ।

बुद्ध शासन छगू थज्याःगु थाय् खः गन सकसियां लागिं समानकथं लुखा चायेकातःगु दु। थःगु जीवन खनाः विरक्त जूपिं, जीवनया मू थुइकाः अरहत प्राप्त यायेगु लागि बुद्ध शासनय् दुहां वःगु खँ बौद्ध साहित्यय् थुकथं न्ह्यथनातःगु दु:
राजगृहया श्रेष्ठी कूलय् जन्म जूम्ह भद्रां मृत्युदण्ड बीत ठीक्क यानातःम्ह थः मतिनामिनाप इहिपा यात। तर छन्हु वया श्री सम्पत्तिया लोभं थःत हे स्यायेत वःगुलिं वं थः भाःतयात प्रदक्षिणा यायेगु त्वह चिनाः घ्वानाः डाँडां कुर्काः स्याना बिल। थय्क स्वयेगु खःसा थन भद्रायात छम्ह ज्यानमारा रुपय् नं कायेफु। तर अथे जूसां बुद्ध शासनय् वयागु बिस्कं थाय् दु। थः भाःतयात स्यानाः विरक्त जुयाः बुद्धया शरणय् वःम्ह भद्रायात भगवान बुद्धं 'भो भद्रा वा' धइगु वाक्यं उपसम्पदा बियाबिज्यात। अथे हे सोणा नं थः कायपिंनाप हने मफयाः बृद्धावस्थाय् बुद्ध शासनय् दुहां वःगु खः। बुद्ध शासन धइगु थज्याःगु थाय् खः। थज्याःगु शासनय् न्हापा हे दुहां वयाच्वंम्ह छम्ह भिक्षुणीयात वयागु छुं अपराध हे मदयेक हाकनं पितिनेगु गुलि तक पाय्छि जुइ?

थन झीसं लुमंकेमाःगु खँ छु धाःसा उम्ह भिक्षुणी थः स्वयमं छुं गल्ती याःगु मखु। वयात कतःपाखें तःगु कुदृष्टिया लिच्वःकथं दोषी जूवंगु खः। थुकथंया घटना ला बुद्धकालय् नं जूगु दु। अहिंसकया नामं पुरोहित गार्ग्य व मैत्रीयणीया कोखं बूम्ह मनू गुरुया कुनियतं अंगुलिमार जू वन। अहिंसकयात अंगुलिमार यायेगु ज्या वया परिस्थितिं याना बिउगु खः। थज्याःम्ह अंगुलिमारयात तकं बुद्धं थःगु शासनय् थाय् बियाः हानं न्हापा थें तुं अहिंसक यानाबिज्यात। उकिं थौं थःगु सर्वश्व त्याग यानाः बुद्ध शासनय् दुहां वःम्ह उम्ह भिक्षुणीया थाय् बुद्ध शासनं गथे चीके फइ?

खय्त ला थौं उम्ह भिक्षुणी शारीरिक रुपं स्वयां मानसिक रुपं अशक्त जुयाच्वंगु दु जुइ। मानसिक रुपं विक्षिप्त जूम्ह पटाचाराया खँ नं थन लुमंकेबहः जू। थः भाःत व मस्त मदयेकाः उइँ जूम्ह पटाचारा बुद्धया 'होश ति मय्जु' धाःगु शब्दं होश वयेकाः दना वल। उलि जक मखु बुद्ध शासनय् दुहां वयाः विनयधरय् अग्रणी स्थानय् तकं थ्यन। अथे हे छम्ह ल्वगि भिक्षुया सन्दर्भय् बुद्धं धयाबिज्याःगु दु � 'भिक्षुपिं ! छिमि मांबौ मदु। सुनां छिमिगु सेवा याइ? उकिं छिमि छम्हं मेम्हेसित सेवा यायेमाः। सुनां ल्वगिया सेवा याइ वं जिगु सेवा याःगु जुइ।' थुगु खँयात मनन् यायेगु खःसा थौं उम्ह भिक्षुणीनाप स्वापू दुगु थासं वय्कःयात भलसा व तिबः बी फयेकेमाः गुकिं यानाः वय्कःयात लाःगु घालय् वासः पायेगु थें जूवनेफु। उलि जक मखु, बुद्ध धर्मय् तनावं मुक्त जुइगु अझ धाये चित्तयात स्थिर यायेगु यक्व हे लँपुत क्यनातःगु दु। थुकथंया बुद्ध शासनय् उम्ह भिक्षुणीयात थाय् बिया तल धाःसा वय्कलं बुलुहुँ जूसां थःत जूगु घालय् थम्हं हे वासः यायेगु लँपु लुइका कायेफइ ।

बुद्ध शासनय् छम्ह गणिकाया प्वाथं बूम्ह मचायात तकं थाय् दुगु खँ बौद्ध साहित्यय् थुकथं न्ह्यथनातःगु दु: शीलवती गणिकाया मचा बुइवं दासिपाखें फोहोरय् वांछ्वयेके छ्वल। लिपा अभय राजकुमारं उम्ह मचायात कयाः शिल्पविद्या नापं जंगलया झारया बारे नं पूर्ण ज्ञान बीके बिल। अथे हे मेगु छगू घटना न्ह्यथने। राजगृहया श्रेष्ठी कन्या थः भाःतया अनुमति कयाः प्रवजित जुल। तर व प्वाथय् दुम्ह जुयाच्वन। लिपा देवदत्तं प्वाथय् दु धइगु सीवं अनं लिकया बिल। अनंलि बुद्धयाथाय् वन। बुद्धं प्रवज्या न्ह्यः हे प्वाथय् दु धइगु खँ सीवं अन तयेगु अनुमति बियाबिज्यात। अन हे मचा नं बुइकल ।

आः, थौं थन खँ स्वानाच्वना छम्ह भिक्षुणीयात याःगु बलात्कारया बारे। उकथंया घटना बुद्धकालय् नं जूगु दु। थज्याःगु खँ बौद्ध साहित्यया अध्ययन यायेबलय् खंकेफु। उत्पलवर्णा गृहस्थीबलय्निसें वया पाजुया काय नन्दं वयाके प्रतिवद्ध चित्त तयाच्वंगु जुयाच्वन। व स्थविरा जुइधुंकाः नं नन्दया चित्तय् हिउपाः मवः। छन्हु उत्पलवर्णा स्थविरा याकःचा दुगु इलय् लाकाः नन्दं थःगु मनोकामना पूरा यात। उत्पलवर्णा स्थविरां थःत जूगु घटना भिक्षुणीपिंत कनेवं उगु खँ भगवान बुद्धयाथाय् थ्यन। तर बुद्धं उत्पलवर्णा स्थविरायात छुं कथंया दोष बियाबिमज्याः। बरु नन्दया सन्दर्भय् थुगु गाथा कनाबिज्यात:-
'मधु व मञ्ञति बालो याव पापं नं पच्चति
यदा च पच्चति पापं बालो दुक्खं निगच्छति ।'

समग्रकथं धायेगु खःसा बुद्ध शासनय् व बुद्ध धर्मय् सुयातं आघात यायेगु ज्या याइ मखु। बरु सुयातं छुंकथंया आघात जुल धाःसा उकिं मुक्त जुइगु लँपु क्यना बी। उकिं थौं थःत आघात जुइकाः च्वनेमाःम्ह छम्ह भिक्षुणी दु, वय्कःयात बुद्ध शासनय् न्हापा थें तुं थाय् बियाः वय्कःया आत्मबल अझ न्हापा स्वयां नं बल्लाकेमाःगु दु। थ्वहे बुद्ध शासनया नियम खः, थ्वहे बुद्धं स्यना थकूगु धर्म खः। थौंया मनूत थुकिं विमखु जुइगु पाय्छि मखु ।

More Stories Like this