माओवादी विवाद: पदीय लोभया अभिव्यक्ति

माओवादी दुने ब्वलंगु विवाद समाधान यायेत आः पार्टी व सरकारय् पदया समायोजन यायेमाःगु अवस्था पिहां वःगु दु। थुकिया निंतिं पार्टी अध्यक्ष प्रचण्डं सरकारय् च्वनीपिं व पार्टीया थीथी पदय् च्वनीपिं मनूतय्गु नां दुथ्याकाः छगू धलः हे तयार याःगु नं सीदुगु दु। पार्टीया आन्तरिक विवाद समाधान यायेत वय्कलं सरकारय् वनाच्वंपिं थःगु पार्टीया मन्त्रीत हिलाबुला यायेगु प्रस्ताव नं न्ह्यःने हयादीगु दु। पार्टी दुने पद विभाजन व सरकार दुने मन्त्रालय विभाजनया खँ मिले जुल धाःसा माओवादीया विवाद नं मिले जुया वनीगु संकेत थुकिं क्यंगु दु। पद व मन्त्रालयया खँ मिले जुइवं पार्टीया विवाद समाधान जुइगु धायेबलय् थ्व माओवादीया सिद्धान्तया विवाद मखु पदया जक विवाद जुयाच्वन धइगु खँ अथें हे पुष्टि जुइ। माओवादीया नेतातय्के ब्वलनावःगु पद प्रतिया लोभ थुकिं क्यनी। थुकिया नेता�तय्सं सरकार दुने नं गृह मन्त्रालय हे दकलय् अप्वः ताके याःगुलिं थुमिके गज्याःगु पदया लोभ ब्वलंगु खः धकाः अजूचायापुक स्वयेमाःगु अवस्था वःगु दु। देश व जनताया लागिं धकाः झिंस्वद्वः मनूया बलिदान बियाः राजनीतिइ कुहां वःगु थ्व पार्टीया नेतातय्के थौं थुलि याकनं पद प्रति लोभ ब्वलंगु खनाः आखिर थुपिं नं मेपिं बुर्जुवा नेतात स्वयां छु पात ले धकाः न्ह्यसः तयेमाःगु अवस्था नं वःगु दु। माओवादी वास्तवय् त्याग व बलिदानया पर्याय मखु जुयाच्वन धइगु खँ थौं उमि दथुइ ब्वलंगु थ्व कचवनं साबित यायेत स्वयाच्वंगु दु। माओवादीं यदि थःत पतन जुइगुपाखें पनेगु खःसा पार्टीयात शुद्धीकरण यानाः लोभ व पापया थ्व भाइरसपाखें थःत मुक्त याये हे माः ।

More Stories Like this