आः हरि श्रेष्ठया खँ न्यनादिसँ

विनोद रञ्जित

वि.सं १९७९ साल फागुन ८ गते यलया महापालय् अबु आशा नारायण व मां पद्मकुमारी श्रेष्ठया कोखं जन्म जूम्ह छम्ह हे जक जीवित मचा खः हरि श्रेष्ठ। वय्कःया झिम्ह तःकेहेँ दुगु खःसा वय्कः बाहेक मेपिं सकलें हे तःकैया शिकार जुयाः मदुगु जुयाच्वन। वि.सं. २००८ साल वैशाख १ गते दकलय् न्हापां रेडियो नेपालय् नेपालभाषां समाचार वाचन यानादीम्ह व्यक्तित्व खः हरि श्रेष्ठ। वि.सं. २००८ सालंनिसें ०२५ साल तक मदिक्क नेपालभाषां समाचार वाचन व रिपोर्टिङ्ग यानाः वय्कः छम्ह नेपालभाषा संचार जगतया न्ह्यलुवाया रुपय् नं स्थापित जुयादीगु दु। अथे हे रेडियो नेपालय् वरिष्ठ सम्पादक जुयाः नं ज्या यानादीधुंकूम्ह वय्कलं अबलय् रेडियो नेपालया प्रशासनय् च्वनाः स्वदँ तक करारय् ज्या याःपिं दक्व कर्मचारीतय्त स्थायी यानादीगु जुयाच्वन। थुकथं रेडियो नेपालया स्थापनाकालंनिसें हे नेपालभाषाया माध्यमं संचार ख्यलय् वय्कलं योगदान बिया वयादीगु खनेदु ।

वय्कः वि.सं. २०४४ सालय् रेडियो नेपालपाखें रिटायर जुयादिल। २०४७ सालय् प्रजातन्त्र वयेधुंकाः रेडियो नेपालं हानं नेवाः भासं समाचार बीगु जुइवं वय्कःयात तुं सःताः समाचार वाचनया जिम्मा बिल। वयां लिपा वय्कलं १० दँ तक थःगु सेवा बियादिल।वय्कः संचार जगतया न्ह्यलुवा जक मखु छम्ह इमानदार सरकारी कर्मचारी नं खः। थुकिया लिसें वय्कः छम्ह नेपाल व नेपालीभाषा साहित्य ख्यःया सक्रिय व्यक्तित्व नं खः। वय्कलं नेपालभाषा व खस नेपाली भासं सफू नं च्वयाः पिथनादीगु खः। छगू ई वय्कलं हुलाक नियन्त्रक जुयाः झिंच्यादँ तक ज्या यानादीगु खः ।

साहित्य ख्यलय् वय्कलं दकलय् न्हापां "ध्रुव ग्व?" धइगु वियोगीनी छन्दया चिनाखँ सफू पिथनादीगु खः। वय्कःया उपन्यास "जागीर" यात नेपालभाषां नाटकया रुपय् नं क्यंगु दु। वय्कलं साहित्यय् पलाः तयाः आपालं चिनाखँ, बाखं, नाटक, च्वखँ आदि च्वयादीगु दु। वय्कलं आपालं रेडियो रुपक नं च्वयादीगु दु ।

साहित्य त्वःताः समाजसेवाय् नं दुथ्याये खंगुलिं थःत गौरवया अनुभव जूगु खँ कनादीम्ह वय्कः गरीबतय् स्याःन्याःमह पासा नं खः। दुःखीपिनि सेवाय् थम्हं मनसें नं मेपिनिगु सेवा, उद्धार व भिं जुइगु ज्या वय्कलं यक्व यानादीगु दु। "समाजया विसंगतियात सत्य रुपं चित्रण यानाः सुधारया दृष्टिकोणं मनूतय्गु नुगलय् थी फइगु साधन हे साहित्य खः" धयादीम्ह वय्कः थौंकन्हय् ८९ दँय् थ्यनाच्वंगु दु ।

थौंकन्हय् थः जहान सरिता श्रेष्ठलिसे मैतीदेवी च्वनादीम्ह वय्कलं छक्वः देय्या ज्याथजिथिपिनि अधिकार सुरक्षा यायेत ज्येष्ठ नागरिक समाज हे स्वनाः नं ज्या यानादीगु खः। उगु इलय् वय्कलं ज्येष्ठ नागरिकपिनि अधिकारया खँयात कयाः नं आपालं च्वसुत च्वयादीगु खः ।

More Stories Like this