निर्दयी नेतात

डा. तुल्सीनारायण श्रेष्ठ

न्यनेबलय् तकं पत्याः याये थाकुगु निर्दयीया पराकाष्ठा। न्यनेबलय् छम्ह राष्ट्रवादी, मानवतावादी नेपाःमिया नुगः गुलि स्याइ, व ला वं हे जक सी। निर्दयी, निरंकुश, निराचार नुगः ज्वनाः नेपाःमि जुयाच्वंपिं व भ्रष्टाचारी, दुराचारी, अत्याचारी नेतातय्सं अपराधीतय्सं छु सी? इमिगु लागि ला न मनूया मू दु, न राष्ट्रियताया हे। इमिगु लागि ला मात्र ध्यबा, ध्यबाया जक हे मू दु ।

खँ सुडान घोटाला काण्डया खः। छम्ह नेपाःमि जुयाः नेपाःमिपाखें, नेपाःपाखें विश्वय् शान्ति स्थापनाया लागि थीथी थासय् छ्वइपिं प्रहरी पुचः नं छगू खः। अथे हे इलय्-ब्यलय् देशं देशय् थ्यनाच्वंपिं नेपाःमिपाखें नेपाःया न्हाय् धस्वनाच्वनी। उपिंपाखें नेपाःया नां च्वनाच्वनी। अले थज्याःपिं नेपाःमितय्त फुगुचाःगु ग्वाहालि यानाः इमिगु सुरक्षा यायेगु नेपाःया जक मखु प्रत्येक नेपाःमिया नं कर्तव्य जुइमाः। तर सडानय् ज्या यानाः च्वनाच्वंपिं प्रहरीतय्गु लागि नेपाःपाखें छ्वयेमाःगु थीथी कथंया सैनिक व बन्दोबस्तीया सामानया बाखं न्यनाः सुं नं छम्ह राष्ट्रवादी, मानवतावादीया मनय् अवश्य नं भुखाय् ब्वइ, अवश्य नं तं पिहां वइ। सुडानय् जहाजं थ्यंकूगु बख्तरबन्द गाडीत ला जहाजं क्वकयाः चले यातं न्ह्याः हे मवं हं, चले हे मजू हं। प्रहरीतय् लागि हःगु वसःत ला छक्वः हिउबलय् रंग व बुट्टा सफाचट् हं। नयेगु-त्वनेगु सामानत ला पुचलय् वांछ्वये हे माः हं। मिडियापाखें न्यनागु बुखँ खः थ्व। बुखँय् मवःनिगु मेमेगु घोटालाया खँ नं अवश्य दइ तिनि जुइ।
सुडानय् ज्या यानाच्वंपिं प्रहरी जवानत नेपाःया मनूत खः। प्रहरी पुचः खः। अले इमिगु लागि माःमाःगु सामान न्यायेगु लागिं काःगु ध्यबा स्वयं प्रहरी कल्याण कोषया खः। राज्यया खः। सुयागुं निजी म्हिचां तयेमाःगु मखु। अय्नं छम्ह अधिकारी जुयाः विदेशय् च्वनाः देय्या नां व प्रतिष्ठाया लागि ज्यान पानाः दुःख सियाः ज्या यानाच्वंपिं थः हे मनूया लागि फक्व बांबांलाःगु, बबःलाःगु, भिंगु सामानत छ्वयाः थः मनूया सुरक्षा याये माःपिं नेतातय्सं, अधिकारीतय्सं अथे ज्या हे मवःगु सामानत छ्वये फुगु हे गथे? पत्याः याये हे थाकुगु बुखँ जुल मखु ला?

नेपाःया नेतातय् अधिकारीतय् थ्व पहः खनाः, थ्व खँ न्यनाः जिं ला पत्याः याये हे मफुत। थौंया संक्रमण कालया नामय् थन भ्रष्टाचार, अत्याचार, अनाचार, अन्याय मजूगु क्षेत्र वा देश हे मदये धुंकल। अय्नं भ्रष्टाचार यायेत नेतातय्सं, अधिकारवालातय्सं थः हे मनू, थःगु हे पेशाया मनू, अझ धायेगु खःसा विदेशय् च्वनाः ज्यान पानाच्वंपिं सीसां थसि, नये मखंसा नये मखनेमा, �वनाः नये मालेमा, नांगां च्वने मालेमा धइकथंया तकं व्यवहार यायेफुगु धइगु निर्दयीया पराकाष्ठा मखु ला? थज्याःपिं सुं नं मानववादी जुइ ला? अधिकारवाला जुइ ला? राष्ट्रवादी, मानवतावादी जुइ ला? मनूया कल्पनां पिने लाःगु राक्षसीपहया ज्या याइपिं थज्याःपिं नेतात अधिकारवालात थ्व देशय् दःसां मेथाय् ला पक्का नं दइ मखु जुइ। थज्याःगु जघन्य अपराधया ज्या यानाः निर्दयी जुयाः ज्या यानाः संसारं सीकाः संसारय् संस्था व सरकारया बेइज्जत जुइकाः नं अझ मसिउ पहः यानाः वं वइत, वं वइत द्वपं बियाः थः निर्दोष जुइत स्वइपिं सकसिनं रामदेवं धाः थें कानून मदुसां कानून दयेमाः ज्यानया सजाय बीमाः। थुपिं ला देशद्रोहीत खः ।

बिडम्बना, थौं नेपाःया राजनैतिक नेतातय्सं, पार्टीतय्सं थज्याःपिं अपराधीतय्त माखां खाचा त्वपुइ थें त्वपुयाः सुरक्षा यानाः अपराध जगतयात प्रोत्साहन बियाच्वन। अःखत दण्डहिनतायात प्रोत्साहन बियाच्वन। पार्टीया नेतातय्सं थौंया जक बिचाः यानाच्वंगु दु। हालयात जक तरे यानाच्वंगु दु। भविष्यया बिचाः यानाच्वंगु मदु। सर्वसाधारण जनतां थू, थज्याःपिं नेतात पार्टीपाखें अवश्य नं तापाना वनी। गुगु इलय् थः विश्वास दुगु पार्टी, नेतात व थःत यःगु पार्टीया नेतात हे अपराध जगतया 'डन' जुया बी धाःसा इमिसं चुनावय् सुयात मत बीगु जुइसा? आः थज्याःपिं कलंकित नेतातय्त पत्याः याये माःगु हे छाय्?

More Stories Like this