दलया नेता महिलीगु पौडेलया दावी
येँ (सन्ध्या टाइम्स)/नेपाली कांग्रेस संसदीय दलया नेता रामचन्द्र पौडेलं पार्टी दुने ल्वापु पिकायेगु लागिं दलया नेता हिलेगु खँ पित हयाच्वंगु खः धयादीगु दु ।
पार्टीया वरिष्ठ नेता शेरबहादुर देउवा पक्षधरं संसदीय दलया नेता हिलेगु नितिं कुतः यानाच्वंगु दुसां आःया इलय् थ्व ज्या जुइगु सम्भावना मदु धकाः नं धयादीगु दु। थौं सुथय् पार्टी सभापति सुशील कोइरालायात नापलाःवःम्ह माओवादी अध्यक्ष प्रचण्डलिसे खँ ल्हानाः पिहां वयाःलि संचारकर्मीलिसे खँ ल्हासें नेता पौडेलं थ्व खँ धयादीगु खः ।
थौंकन्हय् कांग्रेस पार्टी छप्पँ जुयाः न्ह्याः वनाच्वंगु सन्देश प्रवाह जुयाच्वंगु इलय् नेता हिलेगु ज्या यानाः पार्टीइ मेगु ल्वापु पिकाये मजिउ धकाः नं वय्कलं धयादिल। थौं पार्टी सभापति कोइरालायात नापलानाः वयेधुंकाः दलया नेता हिलेगु ज्या जुइ मखु धइगु खँ झन् हे स्पष्ट जुल धकाः नं वय्कलं धयादिल ।
उखे देउवा पक्षं आः थःगु अध्यक्षताय् सरकार गठन जुल धाःसा राष्ट्रिय सहमतिया सरकार दयेके फइगु वातावरण दुगु कारणं थःगु लँपु चायेका बीगु थःत दलया नेता दयेकेमाःगु माग याना वयाच्वंगु दु। देउवाया खँ पार्टी दुने मन्यनीगु जुइवं कांग्रेस दुने हानं कचवं पिहां वइगु सम्भावना ब्वलंगु दु ।
