ब्वंगु छगू बजेट पुस्तिकाय् मेगु

अर्थमन्त्रीया बजेट

येँ(सन्ध्या टाइम्स)/अर्थमन्त्री भरत मोहन अधिकारीं आः नकतिनि चालु आर्थिक दँया निंतिं संसदय् पेस यानादीगु बजेट व बजेट पुस्तिकाय् न्ह्यथना तःगु बजेट बिस्कं बिस्कं जुइवं स्वास्थ्य मन्त्रालय अलमलय् लाःगु दु।
अर्थमन्त्री अधिकारीं संसदय् बजेट पेस यायेगु झ्वलय् ब्वनादीगु बजेटय् स्वास्थ्यया निंतिं नीन्हय्गू अर्ब बजेट फ्यानागु धकाः ब्वनादीगु खः। तर बजेट पुस्तिकाय् धाःसा स्वास्थ्यया निंतिं नीप्यंगू अर्ब ग्वीस्वंगू करोड तका जक विनियोजन यानातःगु न्ह्यथनातःगुलिं अलमलय् लाःगु खः। मन्त्रालयं धाःसा चालु आर्थिक दँया निंतिं नीच्यागू अर्ब तका बजेट माग याःगु खः। यद्यपि थुगुसीया बजेटय् स्वास्थ्यया निंतिं विनियोजन यानातःगु बजेट थगुने आर्थिक दँय् स्वयां छगू अर्ब झिंनिगू करोड तका अप्वः खः। वंगु आर्थिक दँ स्वास्थ्यया निंतिं नीस्वंगू अर्ब चय्छगू करोड बजेट विनियोजन याःगु खः।
स्वास्थ्य मन्त्रालयया उच्च तहया छम्ह अधिकारीं अर्थमन्त्री बजेट भाषण बिउगु इलय् नीन्हय्गू अर्ब धकाः ब्वनादीगु व बजेट पुस्तिकाय् हाकनं मेगु हे बजेट विनियोजना यानातःगुलिं थःपिं अन्योलय् लाःगु खँ धाःगु दु। अर्थमन्त्रीं संसदय् ब्वंगु व बजेट पुस्तिका न्ह्यथनातःगु बजेट स्वयेबलय् निगू अर्ब तका बजेट उखेथुखे जूगु खने दुगु मन्त्रालयं न्ह्यथंगु दु।
वंगु आर्थिक दँ स्वास्थ्य मन्त्रायलया निंतिं विनियोजन जूगु बजेट मध्ये चय्गू प्रतिशतं मल्याक बजेट खर्च जूगु अनुमान याःगु दुसां आतक दक्वं खर्चया विवरण्क मन्त्रालयय् थ्यंकः मवःनीगु मन्त्रालय स्रोतं जानकारी बिउगु दु।
स्वास्थ्य मन्त्रालयया अधिकारीं बजेट तयार याःगु इलय् नं नीप्यंगू अर्ब ग्वीस्वंगू करोड बजेट विनियोजन याःगु जानकारी थःपिंत वःगु नं प्रस्ट याःगु दु।