पार्टी विवाद ज्यंकेत मन्त्री हिलाबुला
येँ (सन्ध्या टाइम्स)/ माओवादी अध्यक्ष प्रचण्डं पार्टीया आन्तरिक विवाद ज्यंकेत मन्त्री मण्डलय् माओवादी मन्त्रीत हिलाबुला यायेत्यनागु खँ कनादीगु दु। थौं सुथय् नेपाली कांग्रेसया सभापति सुशील कोइरालायात वय्कःया हे छेँय् वनाः नापलासें अध्यक्ष प्रचण्डं थ्व खँ कनादीगु खः। कांग्रेस सभापति कोइरालां राष्ट्रिय सहमतिया सरकार दयेकाः न्ह्याः वनेमाःगु इलय् माओवादीं छाय् मन्त्रीत हिलेत्यंगु धकाः न्यंगु न्ह्यसःया लिसः बिसें प्रचण्डं पार्टीया आन्तरिक समस्या समाधान यायेत मन्त्रीत हिलेत्यनागु खँ कनादीगु खः। नेकां सभापति कोइरालां स्वंगू दल दथुइ जूगु न्यागू बुँदाया सहमतियात सार्थक दयेकत नं इनाप यानादीगु खः ।
विदेशय् वासः याकाः नकतिनि लिहां वःगु खःसां हानं उसाँय् मदयाः कोइराला छेँय् आराम यानाच्वंगु दु।सहलहया झ्वलय् प्रचण्डं थःपिनि पार्टी दुने ब्वलंगु विवादं यानाः मेगु ज्याय् पंगः जुइ मखु धकाः नं आश्वासन बियादीगु खः ।
