५३ दँ लिपा थ्यंकः वःगु यःपौ

यःपौ धाल कि न्ह्याम्हेसियां ध्यान वनी। यःपौया कालबिल हरेकसिया लागिं तःधंगु प्रतिक्षा व उत्सुकया विषय जुयाच्वनी। तर अज्याःगु यःपौ थेंज्याःगु विषय ५३-५३ दँ मछि लिपा वयाः ल्हातय् लात धाःसा सुनां छु यायेगु? अमेरिकाया छगू कलेजया छम्ह छात्रयात वया यज्जुं च्वःगु छपु यःपौ थथे हे ५३ दँ लिपा ल्हातय् लाः वःगु दु। उगु यःपौ सन् १९५८ य् छम्ह छात्रां वयात च्वःगु जुयाच्वन।
यःपती क्लार्क सी मूरया नामय् थाय्बाय् च्वयातःगु दु। तर मूरं थःगु नां हिलाः मोहम्मद सिद्दीफ तःगु कारणं उगु पौ थाय्बाय् लुइके मफयाः चाःचाःहिलाच्वंगु जुयाच्वन। पेन्सिल्भानिया युनिभर्सिटीइ उकुन्हु तिनि उगु पौ लुयावःगु खः। न्ह्यइपुगु खँ छु धाःसा ब्याहा न्ह्यः हे च्वयातःगु उगु यःपौ लुयावःगु थौंया इलय् तक सिद्दीकया बोनीलिसे ब्याहा यानाः पारपाचुके नापं जुइधुंकूगु दु। थौंकन्हय् सिद्दीक ७४ दँय् क्यनाच्वंगु दु। निगू पाना दुगु उगु पती 'लभ यु भर एफर बोनी' च्वयाः ल्हाःचिं नं तयातःगु खः। सिद्दीकं उगु इलय् थःपिंसं यःपौ च्वयाः हे मतिना यानागु खँ कँसें बोनीलिसे मतिना लिपा इहिपा यानाः नं आः पारपाचुके समेत जुइधुंकूगु जानकारी बिल। अथे खःसां उगु पतिं थःपिनिगु ज्वःलाःगु भावनायात हाकनं छक्वः ब्वलंका बिउगु खँ नं वं धाःगु दु।

More Stories Like this