भाःतनाप द्यनाच्वंम्ह नेपाःमि मिसा अपहरण

येँ (सन्ध्या टाइम्स)/जापानय् छम्ह नेपाली मिसायात थः द्यनाच्वंगु क्वथां हे अपहरण याना यंकूगु दु। भाःत तोरणनाप द्यनाच्वंगु इलय् मिसापिं सहित दुथ्याःगु छपुचः अपहरणकारीत क्वथाय् दुहां वयाः २७ दँ दुम्ह नेपाःमि मिसा उमा थापायात अपहरण याना यंकूगु खः। स्थानीय ई कथं थौं सुथय् ४ बजे थापायात अपहरण याःगु खः। जापानया साइता केनया कावागोय लागाय् थःगु हे क्वथाय् द्यनाच्वंगु अवस्थाय् बाग्लुङया रिघा धइगु थासय् छेँ दुम्ह थापायात अपरहण याना यंकूगु खँ मगर सेवा समितिया अध्यक्ष मि थापाया धापू उद्घृत यासें जापानया सामुदायिक वेबसाइट 'समुद्रपारी डक कमं' न्ह्यथंगु दु। बाग्लुङय् छेँ दुम्ह तोरण निदँ न्ह्यवंनिसें जापानय् कुक ज्या याना वयाच्वंम्ह खः। अपहरणय् लाःम्ह वया कलाः थापा धाःसा दच्छि न्ह्यः जक जापान वःगु खः। अपहरित थापाया उद्धारया नितिं जापानी प्रहरीं मालेज्या न्ह्याकेधुंकूगु दु ।

नाटकीय शैलीं वःपिं विदेशी थें च्वंपिं मनूतय्सं सुथ न्हापां घन्टी बिउगुलिं तोरण खापा चायेकः वंगु जुयाच्वन। उमिसं उमा दु ला धकाः न्यन। अले दुहां वया कथं थापायात ज्वनाः गाडीइ तयाः यंकल। उगु इलय् तोरणं प्रतिकारया कुतः याःगु खःसां अपहरणकारीतय्सं ल्वाभः क्यनाः स्याना बीगु ख्याच्वः बीवं वं छुं याये मफुगु खः। जापानय् नेपाःमि मिसायात थुकथं अपहरण याःगु थ्व निगूगु घटना खः धाःगु दु ।