लुम्बिनी विकासय् सवा २ खर्ब लगानी !

विश्व शान्तिया केन्द्र धाःसां जिउगु बुद्ध जन्मस्थल लुम्बिनी विकासया निंतिं चीनस्थित गैरसरकारी संस्था एसिया प्यासिफिक एक्स्चेन्ज एन्ड कोअपरेशन फाउन्डेशनं अपार धनराशी खर्च याइगु समाचार पिहां वःगु दु। उगु संस्थां लुम्बिनीयात विशेष सांस्कृतिक केन्द्रया रुपय् विकास यायेगु लागिं करिब २ खर्ब २५ अर्ब तका दां खर्च याइगु खँ प्रकाशय् वःगु दु ।

समाचारय् पिहां वःगु जानकारी कथं लुम्बिनीइ थ्व दां लगानी यायेगु लागिं उगु संस्थां आः नकतिनि संयुक्त राष्ट्र संघया औद्योगिक विकास संगठनलिसे सम्झौता नं यायेधुंकूगु दु। थ्व ल्याखं थ्व ज्या राष्ट्र संघया समेत सहभागिताय् सम्पन्न जुइगु खने दयाच्वंगु दु। थ्वहे खँ न्हापा नं समाचारया रुपय् पिहां वःबलय् नेपाःया सम्बन्धित सरकारी अधिकृतत नापं अजूचाःगु खःसा उमिसं थुकिया लागिं नेपाःलिसे औपचारिक रुपं छुं खँ तकं मजूनि धकाः नं धाःगु खः। अजूचायापुगु खँ ला छु धायेबलय् लुम्बिनीइ उलि दां लगानी यायेगु धकाः न्ह्यचिउगु चिनियाँ संस्थाया सहअध्यक्ष पदय् नेपाःया पुलांम्ह प्रधानमन्त्री लिसें तःधंगु दल माओवादीया अध्यक्ष पुष्पकमल दाहाल च्वनाच्वंगु दु। भाजु दाहालं थ्व ज्याया बारे आः तक नेपालय् गबलें गनं छुं न्ववानादीगु मदुनि। तर थौं विदेशी समाचार एजेन्सीतय्सं थुकिया बारे समाचार बीवं तिनि झीसं सिउगु कारणं थुकिया विश्वसनीयता व कार्यान्वयनया खँ अझ नं क्वातु मजूनिगु सीदु। सवा २ खर्ब चीधंगु रकम मखु। थ्व धाथें खःसा तसकं हे बांलाःगु जुल। तर थुकिया न्ह्यःने लिउने छु मनसाय दु उकी नं नेपालं बिचाः यानाः जक निर्णय बीमाःगु जुइ ।

More Stories Like this