थुकी नं चिउताः तइ ला?

नर्मदेश्वर प्रधान

खँयाखँय्

काय् बुइकेत स्वइ। हानं म्ह्याय्। निराशा जुइ मखु। कुतः याइ। हानं म्ह्याय्। कुतःयात निरन्तरता बी। तर.... हानं हानं म्ह्याय्। म्ह्याय् प्यम्ह दइ। व हीमी चाइ। थःगु कुतलं जक काय दइ मखु। वं पक्का याइ। व ज्योतिषीयाथाय् वनी। सल्लाह काइ। थःगु समस्या कनी। सम्भावना गुलि? न्यनी। बाबा। द्यःभाजु। द्यःमय्जु नापलाइ। काय दयेकेगु जुक्ति छु? बुटी छु? फ्वनी। धर्मकर्म याःसा दइला? आशा याइ। फुगु उपाय याइ। व दृढ जुइ। काय दयेके हे माः। वं अठोट याइ ।

काय् बुइकेगु उपाय। बाबां वयात धाइ। "छं सँ चाये मते। म्वःल्हुइ मते। काय बुइ।" ठीक। व विश्वस्त जुइ। वं सँ लही। सँ ताहाः जुइ। चाइ मखु। सँ झं झं ताहाः जुयावनी। वं म्वःल्हुइ मखु। काय दइ। वया आशा। विश्वास। ताहाः सँय् भर काइ। कलाःया गर्भाधान जुइ। काय जरुर बुइ। व लय्ताइ। बाबाया आशिर्वाद लुमंकी। थःगु ताहाःसँ स्वइ। कलाःया जाया वःगु प्वाः खनी। व उत्साहित जुइ। बाबाया कृपा। व लय्ताइ। सँ चाये मते। म्वः ल्हुइ मते। काय दइ। बाबाया बचन देव वचन हे जुल। व ढुक्क जुइ ।

तर वया आशा विपरित हानं म्ह्याय् बुइ। सम्पूर्ण म्हगस दुनी। चकनाचुर जुइ। ख्वये ला न्हिले ला? तर व हारे चाइ मखु। सँ चाये हे मखु। म्वःल्हुइ हे मखु। काय बुइके। वं संकल्प याइ। सीसां थजु। संकल्पं लिहां वने मखु। व्रत कायम याइ। वं प्रण याइ ।

दँ दँ दयेधुंकल। वं म्वःमल्हूगु। सँ ताहाः जुइ। भ्यालाभ्याला लुइ। धीचिनी। वया प्रण। ज्यान जायेगा, घोडा नही खायेगा। म्वःल्हुइगु, सँ चायेगु व मृत्यु चयन यायेमाःसा मृत्यु ल्यये। म्वःल्हुइ मखु। वं घोषणा याइ। सँ लही। काय बुइके। बुइकां त्वःते ।

बाबाया आश्वासन। वया म्हंगस पूवनी मखु। वया अचेतन मनस्थिति असन्तोष, आक्रोश, निराशां जाइ। सँ चाये मखु। म्वःल्हुइ मखु। वया जिद्दी। जिद्दीं वयात मचायेक मानसिक क्षतिपुर्तिया अनूभुति बी। वया ताहाः सँ। वं बुइके मफुम्ह कायया पर्याय जुइ ।

दँ दँ दइ। म्वःमल्हूगु। सँ लथ्याये मफयेधुंकल। म्वःमल्हूगु म्ह खिति पाँय्पाँय्। ठसठस नवइ। कलाःम्हेसित फसाद। म्वःल्हु धाये। वं सिउ। भाःतया व्रत। काय बुइकेगु इच्छा। काय बुइमा। वया नं म्हगस। भाःतया मनोकामना। वं थू। सिउ। वया समर्थन दु। तर व मेगु हे समस्याय् लाइ। वं चाइ। मिजंया ताःहाकगु सँ। खितिं जाःगु म्ह। नवः। नापं च्वने थाकुइ। ह्वनेच्वने कष्ट जुइ। व कलाः। तापाक्क च्वने, बिसिउँ वने। सम्भव जुइ मखु। भाःत काय बुइकेगु व्रत कयाच्वंम्ह। वया अथक संकल्प। एकनासे धुन। मस्तय्सं निवेदन याइ। म्वःल्हुइ माल। अबुम्हं अस्वीकार याइ। बरु मृत्युवरण याये। म्वःल्हुइ मखु। वं धाइ। सुनां करकाप याये फइ मखु। काय बुइ मखु। वया जिद्दी झंझं तिक्खर जुयावनी ।

म्वःमल्हूगु। सँ मचाःगु। लिच्वः वया कलाःयात लाइ। प्यपुना च्वनेमाःम्ह। पुलांगु संस्कारं धाइ। पति परमेश्वर। भाःत धइम्ह द्य खः। नवः। चिला हु। वं धाये फइ मखु। वयात संस्कारं पनी। वं सिउ भाःतप्रति व समर्पित जुइमाः। सह यायेमाः। सह यायेगु मिसाया धर्म खः। मिजंया म्हय् चासुकै वइ। म्हय् लखं थीके जी मखु। म्वःल्हुइ मखु। सँ चाइ मखु। मिजंया भिष्म प्रतिज्ञा। कलाःम्हं बिचाः याइ। थन खितिया खँ मखु। भाःतया खँ जुइ। जिं धर्म त्वःते मजिउ ।

थ्व धाथें जूगु घटना खः। ब्वनागु। घटना सामान्य खने दइ। तर मार्मिक। रुढ संस्कारं समाज गुकथं प्रभावित जुइ। थ्व घटनां क्यनी। काय हे माः। म्ह्याय् दयां मजिउ। मिजंप्रति मिसा समर्पित जुइमाः। पतिव्रता धर्मं धाइ। बुलुहुँ रुढ संस्कारय् हिउपाः वइ। काय म्ह्याय्या विभेद म्हो जुइ। भाःतं खँ मथूसा थौं मिसातय्सं विद्रोह याइ। काय माः। थौं नं काय म्हइपिं दइ। तर म्हिगः थें मखु। व्रत कयाः। होम यानाः। धर्मकर्म यानाः काय दयेकां छु याये? थौं मां बौ धकाः सु काय पियाच्वनी? च्वनी मखु। रितिथिति पानावइ। चेतना दनी ।

थौकन्हय्। छाय् थें मचाबलय् म्हितेगु न्ह्यवःसात लुमनाच्वनी। मचाबलय् न्ह्यवःसाया संसारय् दुने। तने। न्ह्यवःसा रेल ब्वाके। न्ह्यवःसा हवाइजहाज ब्वयेक। मचाबुद्धि। इपिं फुक्क धात्थे थें च्वनी। आनन्द लुइ। न्ह्यइपुइ। मांबौपिंसं न्ह्यवःसा बी। ह्ययेकी। न्ह्यवःसाय् मस्त जुइ। न्ह्यवःसाय् आनन्द मकाःपिं मस्त म्हो दइ। न्ह्यवःसा कासा। पलखया सौख। मचा ह्ययेकेगु साधन। तःधिकः जुइ। खँ थुया वइ। यथार्थय् दुहां वने। अयनं मचाबलय्या खँत लुमनाच्वनी ।

न्ह्यवःसा। मस्तय् निंतिं खः। मस्त ह्ययेकेत न्ह्यवःसा। तर आश्चर्य ! थौं न्ह्यवःसां ततःधंगु भूमिका म्हिता हइ। जिम्मेवारी वहन याइ। न्ह्यवःसा मस्तय्गु खः। हेला याये। ई पाइ। मछिनावइ। न्ह्यवःसा थौं मनू सिबें बलवान जुया वइ। मनूयात थ्वं लिउने लाकी। बस्वाइ। न्ह्याः वनी। न्ह्यवःसां थौं छु याइ छु मयाइ? धाये मफुगु ई वइ। सेक्स त्वाई ! थौंकन्हय् खूब प्रचारय् वइ। जोडतोडं विज्ञापन जुइ। थ्व ठीक वा बेठीक। विचाः प्वंकाच्वनागु मखु। वास्तविकता। न्यने। न्ह्यथने। सेक्स त्वाइ पसलय् थौंकन्हय् कलाः न्याये दु हं ! भाःत न्यायेफु। आः मिसा मिजंया निंतिं मनू पियाच्वनेम्वाः। न्ह्यवःसां मनूया भूमिका म्हिती। अखबारय् ब्वने। भाःत ताःकाल तक विदेशय् वनी। कलाःभाःत सेक्स त्वाई पसलय् वनी। भाःतम्हं भाःत त्वाइ न्याना बी। काय सी। माजुं एकल भौयात सेक्स त्वाइ न्याना बी। म्ह्याय् ल्यासे जुइ। अविवाहित। मांम्हं सेक्स त्वाइ न्याना हया बी। खः, मखु जिं मसिउ। अखबारय् ब्वने। विज्ञापनया जमाना। थ्व विज्ञापनया खेल हे जक खःला? तर थौंकन्हय् सेक्स त्वाइया प्रचार तीब्र नक्सां यायेत स्वइ। थुकिया समाजशास्त्रीय प्रभाव छु जुइ? विचाः याइम्ह सु?

सेक्स त्वाइया वैज्ञानिकतसें भाःत त्वाइ दयेकल। कलाः त्वाइ नं दयेकल। तर जिज्ञासा। उत्सुकता जुइ। सामाजिक त्वाइ विशेषज्ञतसें काय त्वाइ नं दयेकूगु दु ला? कायया भूमिका म्हितेफुम्ह काय त्वाइ नं न्याये दु ला? जरुर। काय त्वाइ दुसा काय मदयाः धुरुक्क जूपिंत राहत जुइ। काय मदयाः जीवनभर म्वःमल्हुसे खिति थाकाः, नवयेकाः च्वनेमाःगु व्रत। अले सुनानं काय माली मखु। न्ह्यवःसाया आविष्कारक, विज्ञतसें थुखे नं चिउताः तइ ला?

More Stories Like this