कार्यविभाजनय् नेतातय् प्रमुख बः

अध्यक्षं पेश याःगु राजनीतिक प्रस्ताव मखु: गजुरेल

येँ (सन्ध्या टाइम्स)/तःन्हु तकया स्थगन लिपा म्हिगः बल्लबल्ल च्वंगु नेकपा (माओवादी) या केन्द्रीय बैठक थौं हानं स्थगित जूगु दु। 'गृहकार्य मगाःगु' धइगु त्वहचिनाः थौं स्थगित याःगु थ्व बैठक कन्हय् च्वनेगु धाःगु दुसां पार्टी दुने लिपांगु इलय् ब्वलंगु अध्यक्ष प्रचण्ड व मेपिं उपाध्यक्ष गुटं थःपिनि अडान कायम हे यानातःगु कारणं कन्हय् नं थ्व बैठक च्वनीगु सम्भावना मदुगु खँ सूत्रं धाःगु दु ।

म्हिगः १५ मिनेट ति च्वंगु बैठकय् अध्यक्ष प्रचण्डं थःपिनि राजनीतिक प्रस्ताव पेश यानादीगु खः। तर मोहन वैद्य पक्षधर सचिव सीपी गजुरेलं अध्यक्षया उगु प्रस्तावयात 'राजनीतिक प्रस्ताव हे मखु' धयादीगु दु। वय्कलं धयादिल, 'व राजनीतिक प्रस्ताव मखु। व ला अध्यक्षं पेश याःगु कार्यक्रम जक खः। उकी माःगु खँ छुं नं दुथ्यानाच्वंगु मदु ।'

पार्टी आः मंकाः नेतृत्वय् वनेगु धायेधुंकाः अज्याःगु मंकाः नेतृत्वया झलक वइगु छुं हे ज्या अध्यक्षं मयाः धासें मंकाः नेतृत्वया अभिव्यक्ति क्यनेगु लागिं नं पार्टी दुने जिम्मेवारी बाँडफाँडया ज्या दकलय् न्हापां याये माःगु माग वय्कलं यानादीगु दु। जिम्मेवारी बाँडफाँडया ज्या न्हापां मयायेकं मेगु छुं हे ज्या न्ह्यःने वनी मखु धासें वय्कलं आः वइगु भदौ १४ गते दुने हे थ्व यायेमाः व याइ धकाः थःपिंसं आशा यानाच्वनागु खँ नं कनादिल। सेना समायोजनया ज्या भदौ १ गते हे जुइमाः धइगु सहमति दु, व ज्या पूवनी ला धइगु छगू मेगु न्ह्यसलय् वय्कलं धयादिल, 'भदौ १ गते पूवंकेगु धइगु खँ तक जूगु खः, सहमति हे जूगु मखु। ५ बुँदेय् नं व खँ च्वयातःगु मदु ।'

उखे थौंया केन्द्रीय बैठक स्थगित यायेधुंकाः अध्यक्ष प्रचण्डं पार्टीया थःगु पक्षया नेतातलिसे वार्ता यायेगु क्रमयात अझ तीव्र यानादीगु दु। यदि पार्टीया स्वम्ह उपाध्यक्ष व महासचिव छथाय् च्वन धाःसा वय्कः अल्पमतय् लाइगु निश्चित दु। वहे दृश्य खंकाः वय्कलं थौंया बैठक स्थगित यानादीगु खँ सूत्रं धाःगु दु। खँ मिले जुयाः केन्द्रय् वय्कःया बहुमत कायम जुइगु अवस्था मवइगु जुल धाःसा वय्कलं केन्द्रीय कमिटीया बैठक अझ नं सःती मखु धाःगु दु ।