थेच्वयात नं नगरपालिकाय् दुथ्याकेमाःगु माग
येँ (सन्ध्या टाइम्स)/सरकारं स्वनिगलय् थपे याःगु स्वंगू न्हूगु नगरपालिका मध्ये यलया चम्पापुर नगरपालिकाय् नेवाःतय् एतिहासिक बस्ती थेच्वयात दुथ्याकूगु खँय् आलोचना सुरु जूगु दु। चापागाउँ गाविसया सर्वदलीय संयन्त्रय् दुथ्याःगु स्वंगू राजनीतिक दलं प्रतिनिधित्व यानाच्वंपिं स्वम्हं स्थानीय नेतातय्सं थ्व आलोचना याःगु खः ।
सरकारं चापागाउँ व झरुवारासी गाविस दुथ्याकाः चम्पापुर नगरपालिका घोषणा याःगु खः। तर उकी चापागाउँनाप स्वानाच्वंगु थेच्वयात नं स्वाकेमाःगु माग स्थानीय मनूतय्सं यानाहःगु खः। चापागाउँ गाविसया राजनीतिक संयन्त्रय् माओवादीपाखें प्रतिनिधित्व यानादीम्ह भाग्यराम महर्जनं 'सन्ध्या टाइम्स' लिसे खँल्हासें चम्पापुर नपाय् गुगुं नं हालतय् नं थेच्वयात दुथ्याकेमाः धयादिल।
थेच्व व चापागाउँ स्वाना हे च्वंगुलिं थ्व निगुलिं थाय् छगू हे नगरपालिकाय् लायेमाःगु बिचाः वय्कलं प्वंकादिल ।
अथे हे नेपाली कांग्रेसया प्रतिनिधि राजकुमार महर्जनं थेच्व नेवाःतय्गु एतिहासिक बस्ती जूगु नापं थेच्वनाप चापागाउँ छगू कथं स्वानाच्वंगुलिं याकनं हे थेच्वयात नं नगरपालिकाय् दुथ्याकेमाः धकाः माग यानादिल। उकथं हे एमालेया प्रतिनिधि चर सुन्दर महर्जनं नं थेच्वयात चम्पापुर नगरपालिकाय् दुथ्याकेमाः धयादीगु। अथे हे चापागाउँ नागरिक समाजया अध्यक्ष रामभक्त महर्जनं चापागाउँ व थेच्वया स्थानीय जनतां न्हापांनिसें निगुलिं गाविस दुथ्याकाः छगू नगरपालिका दयेकेमाः धकाः माग याना वयाच्वंगु खँ न्ह्यथनादिल। आः नगरपालिका जूगु झरुवारासी स्वयां थेच्व नगर जुइत आपालं पूर्वाधार दुगु पुलांगु नेवाः वस्ती खः। चापागाउँलिसे झरुवारासी स्वाना बिउगुलिं उगु नपाय् नेवाःत अल्पमतय् लाःवंगु दु ।
