माओवादी मन्त्रीतय् न्ह्यःने बेपत्ताया छेँजःपिनि तं

येँ (सन्ध्या टाइम्स)/माओवादी जनयुद्धया इलय् राज्यं याना तःपिं मनूतय् छेँजःपिंसं थौं माओवादीया छगू दर्जन मन्त्रीतय्त नापलानाः थः छेँजःपिनि अवस्था सार्वजनिक यायेत माग याःगु दु। थौं सुथय् सिंहदरवारय् माओवादी संसदीय दलया ज्याकुथी मन्त्रीतय्त मंकाः कथं नापलासें बेपत्ता परिवारं उगु माग याःगु खः। छलफलया झ्वलय् उपप्रधान नापं गृहमन्त्री कृष्णबहादुर महरा, शान्तिमन्त्री विश्वनाथ प्रसाद साह व मेपिं मन्त्रीत सहभागी जूगु खः। सरकारं पिने च्वनीबलय् बेपत्तात सार्वजनिक यायेगु खँ ल्ह्वनेगु तर थःपिं हे सरकारय् थ्यनीगु इलय् धाःसा उकी चिउताः मतल धासें बेपत्ता परिवारं आक्रोश प्वंकूगु खः। इमिसं बेपत्ता परिवारया छेँजःपिनिगु निंतिं स्वास्थ्य, शिक्षा, वसोवास व नसात्वँसाया निंतिं पार्टी व सरकारं ब्यवस्था यायेमाःगु तकं माग यानादीगु खः। लिसलय् उपप्रधान नापं गृहमन्त्री महरां बेपत्ता परिवारया पीडाप्रति पार्टी व थःपिं तसकं संवेदनशील जुयागु दु धासें बेपत्ताया विषयसं सरकारं गम्भीर रुपं कायेगु नापं राहतया निंतिं नं न्हूगु बजेटय् ध्यबा बिनियोजन यानागु दु धयादीगु खः ।