न्हूगु नगरपालिका घोषणाया आशय छु?

सरकारं नकतिनि पेश याःगु बजेटं देय्न्यंकं यानाः ४१ गू न्हूगु नगरपालिका गठन जूगु घोषणा याःगु दु। थौंकन्हय् देय्या स्थानीय निकायत जनप्रतिनिधि विहिन अवस्थाय् लानाच्वंगु दु। थुकिं यानाः दुगु नगरपालिकातय्सं तकं छुं याये फयाच्वंगु मदु। थज्याःगु इलय् छुं गाविसत उखेंथुखें स्वातुमतु स्वानाः नगरपालिका घोषणा यानाया छु अर्थ दइ, थ्व थुइके थाकुगु खँ खः। स्थानीय निकायया चुनाव जुइगु ठेगान मदु। उकिं न्हूगु घोषित नगरपालिकातय्सं ज्या यायेगुली समस्या पिहां वइगु व उगु समस्याया लबः अन नियुक्त जुयाः वइपिं कर्मचारीतय्सं काइगु खँय् शंका मदु ।

मेगु खँ, देय् संघीय व्यवस्थाय् वनीगु निश्चित दु। उगु इलय् प्रान्त निर्माण यायेत देय्यात हानं छक्वः पुनर्सिमांकन यायेगु ज्या जुइ हे तिनि। अथे पुनर्सिमांकन जुइबलय् थौंकन्हय् कायम जुयाच्वंगु भौगोलिक सीमा तकं उखेथुखे जुइ तिनि। आः नकतिनि गुगु न्हूगु नगरपालिकात घोषणा जुल, उगु नगरपालिकात पूर्ण रुपं कार्यान्वयनय् वइगु धइगु देय् संघीय व्यवस्थाय् वनेधुंकाः हे तिनि खः। संघीय व्यवस्थाय् न्हूगु सिमांकन जुइबलय् आः घोषणा जूगु नगरपालिकातय् ख्वाःपाः नं मेकथं हे हिली तिनि। थज्याःगु खँयात तकं वास्ता मयासे हथासं नगरपालिका घोषणा यायेगु गुगु ज्या जुल, व बेकार जक मखु देशय् वयेत्यंगु न्हूगु हिउपाःयात तकं वेवास्ता याःगुया दसि खः। थुकिं यानाः अनावश्यक रुपं मेमेगु नं थासय् नगरपालिका घोषणा यायेमाल धइगु मागयात थना बिउगु दुसा घोषणा जूगु नगरपालिका दुने हे नं गनं सीमा व गनं जनसंख्यायात कयाः असन्तोष ब्वलनाच्वंगु दु गुगु स्वाभाविक खः ।

More Stories Like this