सक्व वज्रयोगिनीया लंपुं छायेगु छुं न्ह्यसः-४

प्रेममान पुं (चित्रकार)

आः पुंतय्सं छ्यलीगु खुगः ततःग्वःगु कलसय् छु छु च्वइ न्ह्यब्वये: छगः श्री गणेश, स्वंगः निल बज्र, छगः बज्रांकुश, छगः ह्याउँगु पलेस्वां ।

चिचीग्वःगुली: १) बज्रांकुस मुद्रा, २) कलस, ३) पास, ४) पुष्पदृश्य मुद्रा, ५) अंकूश, ६) बज्र, ७) द्वार , ८)यज्ञबज्र, ९) उत्पला, १०) जपमाः, ११) तुयूगु स्वां, १२) शंख, १३) खड्ग, १४) त्रिरत्न माः, १५) दाहिने शंख, १६) रत्नमाः, १७) कलस, १८) चन्द्र सुर्य, १९) पात्रय् खड्ग व सफू, २०) गं, २१) त्रिरत्न, २२) ह्याउँगु स्वां, २३) ध्वज, २४) ध्यान ख्वाः २५) सफू, २६) पद्म, २७) यज्ञ बिश्वबज्र, २८) निल बज्र, २९) म्हुतु, ३०) स्वां दुगु कलस, ३१) गाच्व दुगु खड्ग, ३२) ह्याउँगु चाःलय् हाकुगु फुति, ३३) पद्म बज्र, ३४) बज्र, ३५) पुष्पमांजलि, ३६) वँचुगु स्वां, ३७) पाश, ३८) नमस्कार मुद्रा, ३९) म्हासुगु शंख, ४०) यम दण्ड, ४१) वँचुगु शंख, ४२) धनुषबाण, ४३) बज्र, ४४) अंकुश, ४५) मुखः, ४६) बज्र व सफू, ४७) निल उत्पला, ४८) तुयूगु बज्र, ४९) बेक्वःगु निल बज्र, ५०) यज्ञबज्र, ५१) पुष्प यज्ञबज्र, ५२) नाग, ५३) पुइँ हायेगु नाग, ५४) जयलक्ष्मी, ५५) यक्ष लक्ष्मी ।

च्वय् च्वयागु ततःग्वःगु कलशय् निलबज्र स्वंगः खः। व स्वंगः मध्यय् छगः जुजुयात प्रसाद कथं वनी। मेगु गुर्जुपिंत व छगः जिपिं पुंतय्त वइ। थुगुसी व नं पाः जूवन। चीग्वगु गं कलश जक बीगु यात। व नं व थ्व हे मदयक न्ह्यःने छु लात वहे बिल। जिं फी मफयाः ध हे धया, थ्व कलश जिमित मखु। थुलि धायवं गुर्जुपिंसं मसिउ पहलं धयाबिज्यात - जिमिसं ला मसिल छु चिं दुगु लः ल्हायेगु खः? छु थ्व विधि नं वसपोलपिनि ल्वःमने धुंकूगु ला? कि ल्वःमं थें जक याःगु?

अन्तय् पलिस्था, प्रतिस्थापनया झ्वलय् दक्वं होम, यज्ञ क्वचाइ। लिपा गुलि नं थ्व पुण्यगु ज्याया कर्ता खः वय्कःपिं फुक्कं द्यःया न्ह्यःने च्वनाः श्री निल उग्रतारा, बज्रयोगिनी ह्याउँख्वाः माजुयात खँ कनीगु खः। थथे खँ कनीगुयात ता हालेगु वा थिं हायेकेगु नं धाइ। जितः लुमं, न्हापा जितः झंगः लानाः दृष्टिदान याःगुलिं तम्वयाः जि ता, थिं हायकेबलय् नं वने मखु धकाः च्वनागु खः। लिपा ता, थिं हायेकेगु निन्हु न्ह्यः सुथ न्हापां हनेबम्ह अष्ट गुर्जु छेँय् बिज्यानाः उकी वयेत इनाप यानाबिज्यात। जिं वये मखु धया। वसपोलं जिद्दि हे यानाबिज्यात। अथे खःसा न्हापां क्षमापुजा यानाःलि जितः हे दृष्टिदान याकेमाः जिउ लाकि मजिउ धकाः न्यना। वसपोलं जिउ धायेवं जि वना। थ्व ता वा थिं हायेकेगु भाषा थथे दु - 'श्री निल उग्रतारा, बज्रयोगिनी जगत जननी छलपोलया सरिरस गुलि नं मनिंगु, मभिंगु जुयाच्वन जुइ धयागु मती तयागु खः। थथे मती लू थें सकल छपिनिगु सेवास जिपिं (गुर्जु), पुं व नेवाः तकं मुनाः धर्मचित्त जुयाः छपिनिगु कार्य सिद्ध यानागु जुल। गनं द्वंवन वा छुं मखुगु जूवंगु दुसा क्षमा। थनिंनिसें छपिं चन्द्र सुर्य दत्तले, आकास धरति दत्तले थन हे स्थिर जुयाबिज्याहुँ धकाः बिन्ति भाव यानागु जुल।' थथे धयाः सकस्यां द्यःया लुखाखलुया मन्दः भागि यायेमाः। तर थुगुसी जिमिगु ज्याभः नं द्यःया न्ह्यःने मतः। जिमिगु जात वा नां तकं द्यःयात मकं। थथे छाय्? द्यवं जिमित आशिर्बाद बी धकाः गुर्जुपिं ग्याःगु खः लाकि?

छ्यलाभू निसें दक्वं बिधिया पुजाआजा व उं क्वतायेगुं निसें उंया ज्या व पलिस्था तकं क्वचाल। दकलय् लिपा गुलि नं थ्व ज्या याःपिं खः व कर्तात फुकसितं प्रसाद इनीगु खः। व प्रसाद थुकथं जुइ: द्यःया स्वंगः मिखाय् दकलय् न्हापांगु मिखा सिन्हः जुजुयात निलबज्रया कलशय् जल नापं च्वनाः प्रसाद कथं वनी। जवगु मिखा गुर्जुपिंत जुल। खवगु मिखा, निलबज्र कलश व जलनापं च्वनाः जिपिं पुंतय्त बी। तर थुगुसी तग्वःगु निलबज्र दुगु कलश सुकां काल मसिउ। मेगु ल्यं दुगु मिखा नं प्रसाद कथं वइ ला मवइ ला धाये मफुनि। जिपिं उलि तःजिगु प्रसाद काइपिंत हे छखे लाकाः दृष्टि दान हे थःपिंसं यात धाःसा मेगु छु मजुइ धाये मफु। मखुसा उलि तःधंगु द्यःया खव मिखा थ्यंकया प्रसाद काइपिं जिपिं सु ले?

दकलय् लिपा, थुगुसी नं श्री निल उग्रतारा बज्रयागिनी मांया सेवा यायेगु ह्वःताः चूलाका बियाबिज्याःपिं सकल गुर्जुपिंत बन्याय् व सुभाय्। थुगुसी न्हापा स्वयां तसकं न्ह्यइपुल। गुर्जुपिनिगु ब्यवहार तसकं च्वछायेबहः जू। खँल्हाबल्हा नं आपालं जू। सहलह नं ब्याः। परम्पराया खँ त्वःता मेगु छुकी नं छुं धायेथाय् मदु। थ्व लाउंपुलिं छायेगु ज्याया निंतिं ग्वसाः खलःया नायः जुयाबिज्याःम्ह तिलकराज बज्राचार्यजु ला तसकं हे न्ह्यइपु, ख्या नं फः। न्याम्ह थकालि गुर्जुपिं मध्यय् दकलय् चीधिकःम्ह तिलकमानन्द बज्राचार्यजुयात गुकथं सुवाः बी जिके ला खँग्वः हे मदु। छक्वःपतिं वसपोलं थःगु हे बाहनय् तयाः च्वय् बाहालय् थ्यंकाबिज्यात। मखुसा न्हापा थें मखु, पाः गये थाकु। मेपिं थकालि कनक गुर्जु, लाकेन्द्र गुर्जु, साउबा, जेथा गुर्जुपिंत नं बन्याये। बिधि थूम्ह सिउम्ह सिद्धिहर्ष बज्राचार्यजुयात नं नमस्कारया नापं सुभाय्। अथेहे युवराज, तेजराज, सुरत बज्र, पुष्प गुर्जु, लगं गुर्जु, प्रदिप गुर्जु, दुःख सुख ब्याःम्ह नित्य गुर्जु व मेपिं नां मसिउपिंत नं प्रणाम व ज्वजलपा। जितः लःल्हाःगु कलशया द्यःने च्वंगु किसलिं भागि यानाः मां श्री उग्रतारा बज्रयोगिनी, खड्गयोगिनीयाके द्वँबिद्वँ क्षमा फ्वना ।

(क्वचाल)

More Stories Like this