महरायात लित सःतेगु सिफारिस
बाबुरामयात उपनेता प्रस्ताव
येँ (सन्ध्या टाइम्स)/एकीकृत माओवादी दुने लाइन संघर्षया कारणं मन्त्रीतय्गु विषयय् नं विवाद ब्वलंगु दु। थ्व झ्वलय् पार्टी अध्यक्ष प्रचण्ड पक्षधर धयातःम्ह उपप्रधान नापं गृहमन्त्री कृष्णबहादुर महरायात सरकारं लित सःतेत तकं पार्टी दुने सिफारिस जूगु दु ।
म्हिगः च्वंगु माओवादी बैठकं गठन याःगु कार्यदलं उपप्रधान नापं गृहमन्त्री कृष्णबहादुर महरायात लित सःताः वय्कःया थासय् उपाध्यक्ष नारायणकाजी श्रेष्ठयात छ्वयेगु सिफारिस याःगु दु। माओवादीपाखें मन्त्री जुयाच्वंपिं व आः जुइपिं मन्त्रीत समावेश यायेगु निंतिं दयेकूगु कार्यदलं थौं थज्याःगु सुझाव बिउगु खः। माओवादीया म्हिगः च्वंगु केन्द्रीय पदाधिकारीतय् बैठकं पार्टी नेता देव गुरुङया संयोजकत्वय् न्याम्ह दुजः दुगु कार्यदल गठन याःगु खःसा थौं च्वंगु उगु कार्यदलया बैठकं गृहमन्त्री महरायात लित सःतेमाःगु सिफारिस पार्टीयात याःगु खः। नेता गुरुङ मोहन बैद्य किरण पक्षधर खः। अथे हे लिपांगु इलय् उपाध्यक्ष नारायणकाजी श्रेष्ठ नं प्रचण्ड गुट त्वःताः वैद्य-भट्टराई गुटय् वंगु खः ।
कार्यदलं पार्टी संसदीय दलया उपनेता नारायणकाजी श्रेष्ठ जुयाच्वंगु थासय् आः मेम्ह उपाध्यक्ष डा. बाबुराम भट्टराईयात यंकेत नं सुझाव बिउगु दु। उकथं हे मन्त्री दयेकाः छ्वयेमाःपिं धकाः पोष्ट बहादुर बोगटी व सीपी गजुरेलया नां नं सिफारिस याःगु दु ।
बल्ल थौं केन्द्रीय बैठक
पार्टी नेतातय् कार्यविभाजनया विषयय् विवाद जुयाः तःन्हु न्ह्यवंनिसें तःक्वःमछि हे स्थगित जुयाच्वंगु एकीकृत माओवादी केन्द्रीय कमिटीया बैठक बल्लं थौं सःतूगु दु। पार्टीया उपाध्यक्षपिं मोहन बैद्य किरण व डा. बाबुराम भट्टराईपाखें तःन्हु न्ह्यवंनिसें हे केन्द्रीय कमिटीया बैठक सःतेत पार्टी अध्यक्ष प्रचण्डयात दबाव बिया वयाच्वंगु खः। लिपांगु इलय् वयाः पार्टी दुने स्वंगू लाईनया संघर्ष तिब्र रुपं न्ह्याःगु खः ।
वंगु असार १० गते सुरु जुयाः नं न्ह्याबलें गृहकार्य मगाःगुलिं धकाः केन्द्रीय कमिटीया बैठक तःक्वःमछि हे घोषणा यानाः नं स्थगित याये माला वयाच्वंगु खः। माओवादी अध्यक्ष प्रचण्डं आःया अवस्थाय् वइगु भदौ १४ गते तकया नितिं शान्ति व संविधानया नितिं न्ह्याः वनेमाःगु जुयाः कार्य विभाजन लिपा जक यायेगु धकाः न्ह्यथना वयाच्वंगु खःसा उपाध्यक्षपिं बैद्य व भट्टराईनं धाःसा न्हापां कार्यविभाजन यायेमाः धकाः अडान कया वयाच्वंगु खः ।
बैद्य व भट्टराईनं सरकारया खँ नं ल्ह्वनाः आः संसदीय दलया नेता प्रचण्डया थासय् उपाध्यक्ष डा. भट्टराईयात तयेमाःगु नापं प्रस्तावित भावी प्रधानमन्त्री नं भट्टराई हे यायेमाः धकाः माग याना वयाच्वंगु दु। लिपांगु इलय् वयाः प्रचण्ड पक्षधर जुयाच्वंगु मेम्ह उपाध्यक्ष नारायणकाजी श्रेष्ठ तकं बैद्य-भटराई पक्षय् वना बीपं अध्यक्ष प्रचण्ड थःगु हे पार्टी दुने अल्पमतय् लाःगु खः ।
