नगरपालिका घोषणा: गनं विरोध प्रदर्शन, गनं लसता जुलुस
येँ (सन्ध्या टाइम्स)/सरकारं बजेट मार्फत थुगुसी ४१ गू न्हूगु नगरपालिका घोषणा याःगु दु।
वंगु शुक्रवाः संसदय् अर्थमन्त्री भरतमोहन अधिकारीं बजेट न्ह्यब्वयेगु झ्वलय् न्हूगु ४१ गू नगरपालिका नं घोषणा याःगु खः ।
थ्वहे झ्वलय् नवलपरासीया कावासोतीयात नगरपालिका घोषणा यायेमाःगु माग यासें प्रस्तावित नगरपालिका विकास समितिया पदाधिकारीतय्सं थौं सुथय् ९ बजेनिसें कावासोतीया महेन्द्र राजमार्गय् प्रदर्शन यानाः यातायात ठप्प याना बिउगु दु ।
राजमार्ग अबरोध याःगुलिं उखें यात्रा यानाच्वंपिं सलंसः यात्रु अलपत्रय् लाःगु दु। ७० द्वः सिबें अप्वः जनसंख्या दुगु कावासोती, शिवमन्दिर व पिठौली गाविस दुथ्याकाः कावासोती नगरपालिका घोषणा यायेमाःगु स्थानीयवासीतय्गु माग खः ।
उखे नवलपरासीया हे गैंडाकोट व सुनवल गाविस थनिंनिसें न्हूगु नगरपालिका घोषणा जूगुलिं स्थानीय मनूतय्सं सता र्याली पिकाःगु दु ।
