स्वनिगलय् थनिंनिसें च्यागू नगरपालिका

येँ (सन्ध्या टाइम्स)/येँ मनपा व यल उपमनपा ख्वप नपा, किपू नपा व मध्यपुर थिमि नपा यानाः न्यागू नगरपालिका जुयाच्वंगु स्वनिगलय् थनिंनिसें च्यागू नगरपालिका जूगु दु। अर्थमन्त्री भरतमोहन अधिकारीं बजेट भाषण बीगु झ्वलय् थौं श्रावण १ गते स्वनिगलय् स्वंगू नगरपालिका थपे यायेगु घोषणा यानादीगु खः। थपे जूगु स्वंगू नगरपालिकाय् यल जिल्लाया कार्यविनायक नगरपालिका व चम्पापुर नगरपालिका, येँ जिल्लाया शंखरापुर नगरपालिका खः। बज्रयोगिनी, पुखुलाछि, सुनटोल व इन्द्रायणी गाविस दुथ्याकाः सक्व देय्यात केन्द्रित यानाः शंखरापुर नगरपालिका, यलया ख्वना, बुंग व सैंबु गाविस दुथ्याकाः कार्यविनायक नगरपालिका अले चापागाउँ (वा) व झरुवारासी गाविस दुथ्याकाः चम्पापुर नगरपालिका घोषणा याःगु खः। थःपिनि लागायात नगरपालिका घोषणा याःगुलिं स्थानीय मनूत लय्ताःगु दु ।