पूर्वसांसदया अंगरक्षकं मनू स्याना बिल
येँ (सन्ध्या टाइम्स)/सत्तारुढ पार्टी एमालेया पुलांम्ह सांसद जगदिश साहया अंगरक्षक प्रहरी हवलदार प्रवेश महतों गोलीं कयेकाः छम्ह सर्वसाधारण मनूयात स्याना बिउगु दु ।
वंगु चान्हय् सप्तरीइ अंगरक्षक महतों कयेकूगु गोलीं कयाः शम्भुनाथ गाविस वडा नं. ७ या ३५ दँ दुम्ह रामबाबु चौधरी घटनास्थलय् हे सीगु खः। अंगरक्षक महतो नं वहे गाविसय् च्वंम्ह खः। पीडित परिवारं धाः कथं रिसईबी व राजनीतिक प्रतिशोधया पुलांम्ह सांसद साहया हे निर्देशनय् अंगरक्षकं गोलीं कयेकूगु जुइमाः ।
प्रहरी हवलदार महतों न्हापा नं अय्लाः त्वनाः गामय् च्वंपिं सर्वसाधारण मनूतय्त न्ह्यःनेलाःथे दायेगु याना वयाच्वंगु खः। नापं वंगु चान्हय् नं अय्लाखं कयाच्वंगु अवस्थाय् हे वं गोली चले याःगु खँ धाःगु दु ।
गोली चले याःम्ह हवल्दार महतोयात आक्रोशित मनूतय्सं ज्वनाः दाये फक्व दाःगु दु। स्थानीय मनूतय्सं दायाः घाःपाः जूम्ह महतोयात आः वासः यायेत धरानया वीपी कोइराला स्वास्थ्य विज्ञान प्रतिष्ठानय् भर्ना याःगु दु ।
