सेनां अलपत्र याना थकूपिं मिस्त येँय्

येँ (सन्ध्या टाइम्स)/चितवन राष्ट्रिय निकुञ्जया सुरक्षार्थ खटे जुयाच्वंपिं सैनिक जवानतलिसे स्वापू तयाः मचा समेत दयेधुंकाः अलपत्रय् लाःपिं स्थानीय मिस्तय्सं आः छगू पुचः हे गठन यानाः येँय् थीथी मनूतय्त नापलायेगु ज्या यानाच्वंगु दु। सैनिकतलिसे बांलाक हे ब्याहाः याःपिं १०३ म्ह मिस्त व उपिंपाखें दुपिं १६१ म्ह मस्त थौंकन्हय् अलपत्र अवस्थाय् लानाच्वंगु दु। चितवनय् गनं हे सुनुवाई मजुसेंलि आः पीडित मय्जु अनिता चेपाङया नेतृत्वय् छगू पुचः हे येँय् वयाः संसदया मिसा अधिकार सम्बन्धी समिति, रक्षा सचिव व मन्त्रीतय्त नापलानाः दुःख प्वंकेगु ज्या यानाच्वंगु दु। उमित ब्याहाः यानाः मचा समेत दयेकाः उपिं सैनिकत अनं बेपत्ता जुयाः मिस्त अलपत्र जूगु जक मखु अबु क्यने मफयाः उमिसं बुइकूपिं मस्तय् नागरिकता कायेत समेत समस्या जुयाच्वंगु खँ नं पीडित मिस्तय्सं धाःगु दु। सम्बद्ध निकायतय्सं थुकी ग्वाहालि यायेगु खँ धाःगु दु ।