थुगुसी जूगु बजेटया बिजोग

थुगुसी सरकारं पेश याःगु बजेट निता कारणं यानाः तसकं चर्चाय् वल। छता, सरकारं गुकुन्हु बजेट पेश यायेगु तयारी याःगु खः वकुन्हु मधेसी मोर्चाया पंगःया कारणं पेश याये मखन। नेपाःया इतिहासय् बजेट थेंज्याःगु महत्वपूर्ण विषय पेश यायेगु अन्तिम इलय् थ्यंकाः स्थगित यायेमाःगु न्हापांगु घटना थ्वहे खः। मेता, कन्हय् कुन्हु बजेट पेश याये स्वयां न्ह्यः हे उगु बजेट पत्रिकाय् समाचार जुयाः पिहां वयेधुंकल। थुकिं यानाः बजेट सदनय् स्वयां न्ह्यः हे सार्वजनिक जुल धकाः सरकारया कडा आलोचना जुल ।

खतुं थ्व नितां जुइ मजिउगु घटना खः। तर उकी मध्ये नं दकलय् जुइ हे मजुइमाःगु घटना धइगु पेश यायेत्यंगु बजेट स्थगित यायेगु ज्या खः। सरकारं बजेट पेश यायेगु अन्तिम तयारी यानाच्वंगु इलय् मधेसी मोर्चां पंगः थना बिउगुलिं बजेट स्थगित यायेमाल। बजेट स्थगित जुइवं उकिया लागिं तयार जुयाच्वंगु सामग्री फुक्कं पत्रिकाय् थ्यं वन। नेपाः थेंज्याःगु गोपनीयता कायम याये मफुगु देशय् सार्वजनिक जुइत ठिक्क जुयाच्वंगु सामग्री पिने पिहां वनीगु तःधंगु खँ मखु। बरु व स्वयां नं जघन्य खँ ला संसदय् पेश जुइत तयार जुइधुंकूगु बजेटयात बाहुबलया लिधंसाय् पना बीगु ज्या खः। कांग्रेसं संसदया अपमान जुइगु अपाय्धंगु घटनाया विरोधय् छगू शव्द न्वमवायेगु अले वहे घटनाया कारणं सूचना पिहां वन धाःगु खँयात कयाः चाहिं बबाल यायेगु वास्तवय् छुं हे तुक दुगु खँ मखु। कांग्रेस यदि धाथें सदनया माया दुगु पार्टी खःसा सदनया अपमान याइगु घटनाया विरोध यायेमाःगु खः। सूचना पिहां वंगु खँय् सरकारं क्षमा फ्वनेधुंकूगुलिं उकी ताःहाकः खँ ल्हायेमाः ।

More Stories Like this