स्वंगू यान छगू पाठ
बौद्ध दर्शन अध्ययन पुचः इकु बहाःया ग्वसालय् नेपालय् प्रचलित बुद्ध धर्मया स्वंगुलिं यानया गुरुमांपिंपाखें पञ्चरक्षा सुत्र पाठ याकेगु ज्या जुल। बुद्ध धर्मया गुगुं नं सुत्र थुकथं स्वंगुलिं यानया अनुयायीपिं नापं च्वनाः छक्वलं पाठ याःगु थ्वहे न्हापांगु घटना खः। थनया श्रीघः विहारय् जूगु उगु पाठपुजाय् थेरवादीया २२ म्ह अनगारिकापिं, महायानया ३१ म्ह आनीपिं व बज्रयानीया १५३ म्ह गुरुमांपिं यानाः मुक्कं २१७ मिसापिं बौद्ध अनुयायीपिंसं ब्वति कयाबिज्याःगु खः ।
बौद्ध धर्मया उद्देश्य छगू हे जूसां महायान, बज्रयान व थेरवादी स्वंगुलिं यान बिस्कं बिस्कं हे जुयाच्वंगुलिं स्वंगुलिं यानयात समग्र रुपं हयेगु आज्जुं थुकथंया पाठ याकागु खँ मूलाचार्य जगदीशरत्न बज्राचार्यं 'सन्ध्या टाइम्स'यात कनादिल। देशय् शान्ति स्वस्ति जुइमा धइगु कामना यासें उगु पाठ याकूगु खः ।
ज्याझ्वःया न्हापांगु ब्वय् सप्तविधानोत्तर पुजा नं जूगु खः। थगुने श्रीघः चैत्यया गजू प्रतिस्थापन याःगु तिथि कुन्हु हे थुगुसी समापन ज्याझ्वः न्ह्याकेकथं मैत्रीय पूर्ण महाविहारया गुरुजुपिंपाखें उगु पुजा याःगु खः। श्रीघः चैत्यं थुगु विहारया बज्राचार्य बागबज्रं पलिस्था यानादीगु जूगुलिं थुगु चैत्यया न्ह्यागु ज्या याःसां उगु हे विहारं यायेमाःगु चलन दु। उगु पुजा ज्याझ्वः बौद्ध विद्वान यज्ञमान पति गुरुजुया नेतृत्वय् न्ह्याःगु खः। थगुने फागुनं वाफसं उगु चैत्यया गजू कुतुं वंगु खः ।
