सक्व वज्रयोगिनीया लंपुं छायेगु छुं न्ह्यसः-३

प्रेममान पुं (चित्रकार)


अंगबिन्यासया दिं। सुथय् हे फुक्कं उंमिलात कया यंकल। जितः मसःतू। न्ह्यःने नं मतः। लिपा पुजा क्वचायेकाः सःतल। दुहां वना।च्वय् च्वया थें उंमिलात स्वनातःगु खना। अजूचाया। छुं हे मन्दः विधि कथं पाय्छि मजू। खय्फु वसपोल गुर्जुपिनि थःगु हे शास्त्र वा विधि जकं दु ला?

थुबलय् नं जिगु निपां ल्हाः न्हापा थें पुज्यात। उंमिलात लःल्हात। न्हापां वँचुंनिसें तुयू, ह्याउँ, वाउँ व म्हासु लःल्हायेधुंकाः दकलय् लिपा क्वँय् (बुस) व हाकुगु जुल। थुलि क्वचायेवं जि द्यःयाथाय् दुहां वना। गुर्जुं धयाबिज्यात, न्हापां वँचुंनिसें छायेगु। जिं न्ह्यसः तया- थ्व वँचु द्यःया म्हय् गन गन छायेगु (वा किकेगु)? मसिउ धयाबिज्यात। थुकथं हे जिं गथे उं मिलात लःल्हाना कयागु खः उकथं हे छगू छगू पतिकं न्यँन्यं वना। छता हे उं थन थन छायेगु धयागु लिसः मवः। छाय्? जिं सि हे सी नि धकाः लाकि धाथें हे मसिउगु खः? अथेसां नं जिं सिउ थें ज्ञानं चाः थें उंत छाया। दकलय् लिपा हाकुगुया पाः वल। हाकुगु उं गन गुथाय् छायेगु धयागुली जितः नं व याये थ्व याये मंत। न्ह्यसः तया, लिसः हे मदु। हाकुगु ला दृष्टिया निंतिं जक खः। थ्व ज्या न विधि, न शास्त्र छुं हे कथं मताल। विधिवत रुपं द्यःया लाउँ कथं वँचु, तुयू व ह्याउँ उं छायाः मेगु उं मू मू तिसा कथं छायाः क्वचायेका ।

४) आः दृष्टिदानया निंतिं गथे खः, जिं सिउ कथं ब्वये - शास्त्र कथं द्यःया गज्याःगु रुप व मुमूगु लक्षण दयेमाःगु खः, व दक्वं ज्या यायां वसपोलयागु हे मन्त्र श्लोक ब्वँब्वं लु तकं लुइकु लुइकुं उंया ज्या क्वचायेका। मिखा ग्वः नं तया। नानिया दथुइ हाकुगु फुतिया पलेसा तुयूगु ल्यंका तयेगु खः। थ्व हे तुयूगु फुतिइ अन्तय् हाकुगुलिं जायेकेगुयात हे दृष्टिदान धाइगु खः। थनंनिसें तिनि द्यः देवीं दृष्टि कनी। थुकिया नं विधि दु। जिं न्यनातयागु व पुर्खां कनातः कथं गुर्जुपिं व जिपिं (पुं) निखलः नं चान्हय् सक्वया हे छगू दिपय् वनाः दृष्टि काः वनी। अन विधिवतं पुजाआजा यानाः दृष्टि कया हइ। थुबलय् जिपिं मवंसां जिउ। न्हापां स्वना तःगु हाकुगु उं ज्वना वंसां गाः। अन नं वहे हाकुगु उं हाकनं स्वनी। मोहनि नं फइ। व हे फःगु मोहनि व न्हापां स्वंगु जिमिगु हाकुगु उं दृष्टिदान कुन्हु हे ल्वाकछ्याइगु खः। थुबलय् नं जिमिगु ल्हाः पुज्यानाःलि हाकुगु उंमिला व क्वँय्या पलेसां बज्रसुता लः ल्हाइगु खः। बज्रसुता अथेहे ४-५ इञ्च हाकःगु छ्वालि पाय्पु जुइ। थ्व छखे वहःया बज्र, मेखे अथें गुलिचागु जुइ। बज्रया च्वकाय् लुँ फुति दइसा मेखे च्वकाय् वहः जक जुइ। थ्वहे बज्रसुताया निखें च्वकां नितां ल्वाकज्याःगु हाकुगु उं (रंग) थुनेमाः। अनंलि साइतय् स्तोत्र, मन्त्र ब्वँब्वं नानिया खालीगु तुयूगु ब्वय् थीकाः मिखा कंकेगु खः। धाइ, दृष्टि कंकेबलय् द्यःया मिखा व थःगु मिखा चूलाके मजिउ। थः भतिचा छखे स्वयाः कंकेमाः। थ्व विधित जिगु पुर्वज नापं जिमि तःबाः माणिकमान बाः पृथ्वीमान पुंनं तकं कनावंगु खः। थुगुसी मिखा नं कंकेम्वाःल। बिधि कथं नं मजुल। छाय्? थ्व नं छगू न्ह्यसः जुल। जितः लुमं, बि.सं. २०३२ स जि न्हापां दीक्षा मन्त्र कयाः दुहांवनागु खः। मेगु खँ मसिउनि। वयां लिउ नं जिमिगु हे कवःतय्सं याःबलय् नं जि न्ह्यःने मलाः। बि.सं. २०५५ सालय् जि थःहे कजि जुयाः वसपोलया लांउंपुलिं छायेगु पुण्यगु ज्या क्वचायेकागु खः। उबलय् नं दृष्टिदानया दिनय् सुथंनिसें छुं नये मजिउ धका द्यांलाकाः उंजक ल्वाकछ्याके बिल। लिपा दृष्टिदान थकालिया ल्हातं याकल। न ल्हाःपुजा हे यात, न बज्रसुता हे लःल्हात। लिपा दृष्टिदान क्वचाल, ल्यं दुगु तुयूगु ब्वय् जक हाकुगु उं जायेकि धाल। जि तसकं नुगलय् स्यात। तं पिहां वल। जि ल्वाना। म्हुतु तकं ल्हाना। खः जितः उबलय् तसकं हे तं पिहांवःगु खः। थुलि जुइवं जि वकुन्हु हे तमं थःगु ज्याभः उंत दक्वं ज्वनाः लिहां वया। थ्व जुल झिंनिदँ न्ह्यःया खँ। थुगसी ला झन् न्हापा स्वयां झं निदुगं स्वदुगं धइथें हे मखुगु नियम जूवन। धाथें हे धायेगु खःसा थुगसीया द्यवं नं मिखा हे मकं धाःसां पाइ थें मच्वं। थ्वयां न्ह्यः नं न्हापां स्वनातयागु जिगु हाकुगु उं व मसानं कयाहःगु मोहनिया हाकः ल्वाकछ्यानाः दृष्टिदान ला जूगु खः। थुगसी ला जितः द्यां नं मलाकू। धा तकं मधाः। नितां उं ल्वाक नं मछ्याकू। थःथःपिं हे वन हं। दृष्टि कया हल हं ! थःपिंसं हे दृष्टिदान नं जुल हं। छु थ्व देगः दने क्वचायेकाः गजू जक छुइगु ज्या मजू ला? झी बासं च्वनेगु छेँ जक दंसां दने क्वचायेवं दँकःमियात हे पल्लिइ छ्वयाः चाग्वारा तयाः पताः छानाः पुजा याके बी। म्ह्याय्मस्तय्सं हइगु पताः तकं इमित हे ब्वयेके बी। छगू जिज्ञासा तये, जिमिसं दृष्टिदान याये मजिउगु खःसा तोरणय् च्वंपिं व मेमेपिं द्यःदेवीपिनिगु मिखा छाय् कंके बिया? तोरणय् च्वंपिं नं ला वसपोलया हे मेमेगु रुप खः। गन स्वचित्त जुइ अन द्यः लुइ ।

मेगु न्ह्यसः तये, द्यःया म्हय् रंग क्वतायेगु धकाः स्यंके बीबलय् जिपिं। उंया ज्या दक्वं क्वचायेकाः दृष्टिदान याइपिं गुर्जुपिं ला? अर्थात् पाप जिमित, पुण्य गुर्जुपिंत? न्यना कथं रंग क्वतायेगु नं दकलय् न्हापां गुर्जुया थकालिं हे याइगु हं। थथे खःसा गुर्जुं रंग क्वताये न्ह्यः व पुजाय् जिमित छाय् मतल? व रंग क्वतायेगु ज्याभः जिमित छाय् लःल्हात? थकालि गुर्जुया ल्हातिइ छाय् मतल? न्हापां गनंनिसें रंग क्वतायेगु धकाः न्यनाबलय् थनंनिसें अनंनिसें धका छाय् मधाल? जिं गुर्जुपिंके 'थकालि गुर्जुया ल्हातय् ला क्वतायेगु ज्याभः मखं, गथे न्हापां गुर्जुं क्वताल?' धकाः न्यनाबलय् 'गुर्जु थकालिं ज्याभलं मखु बज्रं थि जक थीकाः क्वताइगु' धाल। धाथें हे क्वताःगु खःसा गनं छथाय् वा मूगु थासय् छुं छुं ला स्यना च्वनेमाःगु खः। थथे छुं मखं। खतुं बज्र छुं स्यंकेगु ज्याभः मखु, भिं जक भिंकी। गनं माल धाःसा वज्रं स्यंके नं फु धाइ। गनं अन्याय जुयाच्वन वा मभिं जुयाच्वन धाःसा अन बज्रं प्रहार यानाः रक्षा याइ ।

थ्व खँय् जितः थथे ताः, थ्व फुक्कं जातया अहम् खः। वसपोलपिं बज्राचार्य, गुरुजु। वसपोलिपिं सकस्यां हनेमाःपिं धइगु अहमं जिपिं च्वय् मेपिं क्वय् धइगु मनसायं ब्वलंगु खनेदु। तर गुर्जुपिं मञ्जुश्री, बिश्वकर्मा स्वयां च्वय् ला मखु। मखुसा ज्या थी न्ह्यः जिगु वा जिमिगु ल्हातय् मञ्जुश्री, बिश्वकर्माया चिं स्वस्तितकं च्वयाः हस्तपुजा छाय् यात?। गबलय् तक जिमित बिश्कर्मा पुजा यानाः बिश्वकर्मा लित तइ मखु उबलय् तक ल्हाः जक मखु जिपिं तकं बिश्वकर्मा कथं हे जुयाच्वनी। बरु वसपोलपिंत सुझाव बिया तये, लिपा लिपा थज्याःगु पुण्यगु ज्या याके माःसा हस्तपुजा यानाबिज्याये मते। छलपोलपिं क्वय् लाइ। खतुं जि छ्याता बी योग्यम्ह ला मखु। जि छम्ह पुं जक खः ।

६) द्यः देवीया लाउंपुलिं छायेगु बिधिया झ्वलय् दकलय् लिपांगु बिधि खः, द्यः देवीपिंत बास बियाः सदांया नितिं स्थिर याकेगु। थुकियात पलिस्था यायेगु धाइ। थ्व बिधिइ नं न्हापां सियरा आहुति यज्ञ, होम यायेगु खः। अर्थात् सर्वकार्य सिद्ध यानाः द्यःयात निमन्त्रणा यानाः थःथःगु थासय् च्वनाबिज्याहुँ धकाः अग्नियात नं न्ह्यःने तइगु। थ्वहे अग्निइ थीथी सिन्ता, स्वसिँ, श्रीखण्ड आदि च्याकाः होम याइ। हाकनं थ्व हे होमय् जन्म जराब्याधि प्राणीयां पापं मुक्त जुइमा धयागु कामनां थीथी बीबःत नं दु�वाइगु खः। न्हापा थ्व सियरा आहुति यज्ञ याइबलय् च्वय् द्यःयाथाय् म्येय् छम्ह संकल्प यानाः क्वय् मांकाद्यःयाथाय् यंकाः बलि बी। थ्व प्रथा २०५५ सालं निसें न्हंकल। गुर्जुपिनि विधिइ छुं प्रथा न्हंके नं जिउ धयागु दु लाकि? मखुसा व नं छगू कथं पशुयात थुगु जन्मय् पशु जूसां सदांया निंतिं मुक्त यायेगु खः। थ्व होम यज्ञ वा पलिस्थाया निंतिं आपालं पुं ज्वलंत माः। गथे कि अष्टमंगः फय्गं, चाया ततःग्वःगु कलश खुगः व चिचीग्वःगु नाग अम्प नापं यानाः न्यय्न्यागः। सलापाः न्यापाः व म्वकी न्याकू। थथे खःसां अष्टमंगल व फय्गं नं मच्वकू। सलापाः च्वकल, म्वकी मच्वकू। द्यःदेवीपिनि इहि यायेत सलापाः माःसा म्वकी म्वाःला? थ्व नं जिं मथुल ।

(कथहं)

More Stories Like this