नेपालभाषा ब्वँमिपिन्त त्रिविवि, एल्भीस व पुष्पदेवी छात्रवृत्ति लःल्हात

नेपालभाषा केन्द्रीय विभागया ग्वसालय् थौं गुरुपुन्हिया झ्वलय् ब्वँमिपिन्त थी थी छात्रवृत्ति लःल्हायेगु व पाटन संयुक्त क्याम्पसया प्रमुखय् न्हू नियुक्त जुयादीम्ह भाजु अमन श्रेष्ठयात नं िभंतुना देछायेगु ज्याझ्वः जुल ।

विभागीय प्रमुख प्रा. प्रेमशान्ति तुलाधरया सभाध्यक्षय् जूगु उगु ज्याझ्वलय् त्रिभुवन विश्व विद्यालयपाखें बीगु छात्रवृत्ति कथं नेपालभाषा स्नातकोत्तरया न्हापांगु दँया ब्वँमिपिं अश्विन वीर िसंह ताम्राकार व गंगा बज्राचार्ययात अथेहे निगूगु दँया शान्ति महर्जन व दिव्या ताम्राकारयात मूपाहां क्याम्पस प्रमुख अमन श्रेष्ठं लःल्हानादिल ।

थुकथं हे मदुम्ह पुष्पदेवी तुलाधरया नामय् दाता पंचवीर िसंह तुलाधरं नीस्वनादीगु "पुष्पदेवी तुलाधर छात्रवृत्ति" न्हापांगु दँय् ब्वनाच्वनादीपिं विमलकेशरी अमात्य व सुनीता राजभण्डारीयात अथेहे निगूगु दँया अमिता डंगोल व नानीमैंया महर्जनयात दाताया म्ह्याय् परला तुलाधरं लःल्हानादिल ।

थ्वहे झ्वलय् मदुम्ह पत्रकार एल्भीस जोशीया नामं स्वनातःगु एल्भीस जोशी लुमन्ति धुकूपाखें बीगु "एल्भीस छात्रवृत्ति" निगूगु दँय् पत्रकारीता विषय कयाः ब्वनाच्वनादीम्ह मय्जु उर्मिला महर्जनयात लुमन्ति धुकूया छयांजे नापं सन्ध्या टाइम्सया सम्पादक सुरेश मानन्धरं लःल्हानादिल । लुमन्ति धुकूपाखें निदँय् छक्वः एल्भीस सिरपाः व दँय्दसं एल्भीस छात्रवृत्ति बीगु याना वयाच्वंगु खः ।
अथेहे स्नातकोत्तर तगिंया न्हापांगु दँय् ब्वनाच्वनादीम्ह मय्जु रमा कर्णजीतं थः गुरु मास्टर जगतलालया नामं छम्हेसित दँय् छक्व सिरपाः बीगु लागि न्हूगु सिरपाः नीस्वनेगु घोषणा यानादिल ।

सह प्रा. ओमकारेश्वर श्रेष्ठं लसकुस यानादीगु उगु ज्याझ्वलय् क्याम्पस प्रमुख अमिन श्रेष्ठ सन्ध्या टाइम्सया सम्पादक सुरेश मानन्धरं थः थःगु नुगः खँ प्वंकादीगु खः ।

More Stories Like this