बलात्कारय् प्रयोग जूगु गाडी त्वःतकेत चक्का जाम

येँ(सन्ध्या टाइम्स)/पूर्वी नेपाः लागाय् छम्ह भिक्षुणीयात बलात्कार याःगु घटनाय् प्रयोग जूगु बस त्वःतेमाल धइगु माग यासें थीथी यातायात ब्यवसायी व मजदुर संगठनतय्सं थनिंनिसें धरानं कोसी पहाडी रुटय् चले जुइगु यातायात बन्द याना बिउगु दु।
थनिं स्ववाः न्ह्यः बसय् च्वनाः थःगु छेँय् वनाच्वंम्ह छम्ह बौद्ध भिक्षुणीयात ड्राइभर व खलासी यानाः न्याम्ह मनूतय्सं बस दुने हे बलात्कार याःगु खः। उगु घटना लिपा प्रहरीं घटना जूगु ना. २ ख १३९५ नम्बरया बसयात ज्वनातःगु खः। आः यातायात व्यवसायीतय्सं उगु बस तत्काल हे त्वःतेमाल धइगु माग यासें यातायात ठप्प याःगु खः। थीथी १८ गू यातायात व्यवसायी नापं मजदुर संगठनतय्सं बन्द आह्वान याःगुलिं थौं धनकुटा, तेह्रथुम, संखुवासभा लगायतया रुटय् चले जुइगु गाडी ठप्प जूगु दु।
वंगु असार १० गते चान्हय् उगु घटना लिपा स्थानीयवासीतय्गु दबावय् प्रहरीं उगु बसयात नियन्त्रणय् धाःगु खः। बलात्कारीतय्त धाःसा आः तक ज्वने मफुनि। पीडित भिक्षुणीयात आः सिलगुडीया अस्पतालय् वासः याकातःगु दु। व्यवसायीतय्सं धाःसा गाडी मत्वःतूसा तःधंगु आन्दोलन यायेगु ख्याच्वः बिउगु दु।