चलः व खुसिबालं दर्जनौं बेपत्ता

येँ(सन्ध्या टाइम्स)/चच्छि मदिक्क वा वःगुलिं थौं सुथय् चलखं ल्हानाः रुकुमय् छखा हे छेँया झिम्ह मनू बेपत्ता जूगु दु। अनया पुर्तिमकाँडा धइगु लागाय् चलः वनाः छखा हे छेँय् द्यनाच्वंपिं झिम्ह मनू बेपत्ता जूगु खः।
सदरमुकाम मुसीकोटं ४० कोश तापाःगु स्थानीय उदिराम बुढाया छेँ छखां चलखं ल्हाःगु खः। उकी लानाः छेँ थुवाः उदिराम बुढा, वया कलाः, काय् खडकबहादुर बुढा, भौ कवली बुढा, निम्ह छयपिं रोसन व एकराज, म्ह्याय् गौनी विसी, जिलाजं रुद्रबहादुर बीसी, छयपिं नवराज व जीवन बेपत्ता जूगु खः। घटनास्थलय् प्रहरी वने धुंकूगु दु।
उकथं हे रुकुमया भला टाकुरीया धनसिंह खड्काया छेँ नं चलखं ल्हानाः अन द्यनाच्वंपिं स्वम्ह मनू सीगु दु। चलखं ल्हानाः खड्काया निम्ह म्ह्याय् व छम्ह काय सीगु खः।
अथे हे मदिक्क वा वःगुलिं नुवाकोटया खहरे खुसिबाः वयाः थानसिङ गाविसया बेलासपुरया छखा हे छेँया स्वम्हेसित चुइका यंकूगु दु। २१ दँ दुम्ह साने मिजार, वया कलाः १९ दँ दुम्ह निर्मला व दछि दुम्ह शुष्मा खुसिं चुइकाः सीगु खः। मेपिं न्याम्हेसित धाःसा स्थानीय मनूतय्सं उद्धार याःगु दु। मिजार परिवार द्यनाच्वंबलय् चान्हय् खुसिबाः वयाः चुइका यंकूगु खः।
अथे हे चान्हय् मदिक्क वःगु वां यानाः पासाङ ल्हामु राजमार्गया ककनी-ओखरपौवा खण्डय् नं चलः वंगु दु। उकिं यानाः राजमार्ग बन्द जूगु दु। उगु लागाय् चीधंगु व तःधंगु यानाः न्हय्गू थासय् चलः वनाच्वंगु दु।