सुथंनिसें मधेसवादीलिसे वार्ता

येँ (सन्ध्या टाइम्स)/सरकारं न्हूगु आर्थिक वर्ष २०६८/६९ या नितिं हयेत्यंगु बजेटयात थःपिनि माग संवोधन यायेमाः धकाः अडान कयाच्वंपिं मधेसवादी दलतय्गु मोर्चां पना बीवं थौं सरकारवादी दल व मधेसी मोर्चाया नेतातय् दथुइ वार्ता जूगु दु ।

थौं सुथय् ९ बजेनिसें संविधानसभा भवनय् च्वंगु उगु बैठकय् मधेसवादी दलया नेतात सकारात्मक जूगु खँ प्रधानमन्त्री झलनाथ खनालं धयादीगु दु। वय्कलं संचारकर्मीलिसे खँल्हासें थौं संसदय् बजेट पेश यायेगु नितिं सकारात्मक रुपं वार्ता जुयाच्वंगु व थौं हे बजेट पेश यायेगु जुइ धयादीगु दु। थौं सुथय् सरकारं मधेसी मोर्चाया नेतातय्त प्रम निवास वालुवाटारय् सःतूगु खःसां मधेसवादी नेतातय्सं संविधानसभाया भवनय् हे बैठक च्वनेगु धकाः अडान काःगुलिं संविधानसभा भवनय् हे वार्ता जूगु खः ।

थौं न्हिनय् १ बजे सदनय् बजेट पेश यायेगु ज्याझ्वः दयेकातःगु दु। तर बजेट न्ह्यः मधेसी मोर्चाया नेतातय् दथुइ वार्ता याइगु जूगु दु। वार्ताय् मधेसी मोर्चां थःपिंत संसदया प्यंगूगु शक्तिया रुपय् स्वीकार याये माःगु नापं राष्ट्रिय सहमति जुइगु इलय् थःपिंत नं अनिवार्य रुपं दुथ्याकेगु लिखित प्रतिबद्धता प्वंकेमाःगु माग याःगु दु। उगु बैठकय् वर्तमान सरकारय् दुथ्याःगु एमाले व एकीकृत माओवादीया नेतातसें ब्वति काःगु खःसा प्रमुख प्रतिपक्षी कांग्रेसया नेतात धाःसा उपस्थित मजू। सूत्रं धाः कथं मधेसवादी दलया नेतातय्गु राजनीतिक मागयात कयाः प्रमुख प्रतिपक्षी कांग्रेसया नेतातलिसे सहलह ब्याकाः जक मेगु वार्ताय् च्वनेगु तयारी सरकारं याःगु दु। मधेसवादी दलतय्गु उगु माग पूरा जुल धाःसा थौं हे संसदय् बजेट पेश जुइगु सम्भावना दु। थौं बजेट पेश मजुल धाःसा देय्या अर्थतन्त्रय् हे लिच्वः लाइगु जूगुलिं सरकारं न्ह्याथे यानाः नं थौं हे बजेट पेश यायेत कुतः याइ धाःगु दु ।