राष्ट्रपति विरुद्ध संकल्प प्रस्ताव
प्रस्ताव तयेके बिउसा संसद न्ह्याके बी
राष्ट्रपतिया पलाः विरुद्ध मेगु राजनीतिक पार्टीतय्सं साथ मबिउसा माओवादी याकःचां हे जूसां संकल्प प्रस्ताव दर्ता यायेगु निर्णय याःगु दु । थौं सुथय् प्रधानमन्त्री निवास बालुवाटारय् च्वंगु माओवादी सचिवालयया बैठकं थ्व निर्णय याःगु खः ।
सदनय् राष्ट्रपति विरोधी थःपिनि संकल्प प्रस्ताव दर्ता याके बिल धाःसा थःपिंसं नं सदन न्ह्याके बीगु निर्णय नं माओवादीं याःगु दु ।
सदनय् संकल्प प्रस्ताव दर्ता यायेधुंकाः मेगु राजनीतिक पार्टीया नं समर्थन मालेगु नितिं कुतः यायेगु निर्णय नं बैठकं याःगु दु । थौंया बैठकय् अवरुद्ध सदन २२ दलया गठबन्धन बारे नं सहलह जूगु खः ।
थ्वहे झ्वलय् सभामुख सुभाष नेम्बाङ्ग व प्रधानमन्त्री पुष्पकमल दाहाल प्रचण्डया दथुइ कन्हय् तकया दुने सदन सुचारु यायेत सहमति जूगु खँ धाःगु दु । माओवादीं न्ह्यब्वःगु संकल्प प्रस्ताव सदनय् यंके बीगु जुइवं थ्व सहमति जूगु खः ।
थौं सुथय् बालुवाटारय् जूगु खँल्हाबल्हाय् सभामुख नेम्वाङ्गं अवरुद्ध सदन सुचारु यायेत प्रमयात आह्वान यानादीगु दु । उगु इलय् प्रम प्रचण्डं संकल्प प्रस्ताव दर्ता यायेगु नितिं माःगु तयारी व ग्वाहालि यायेत सभामुख नेम्वाङ्गयात इनाप यानादीगु खः । लिसलय् सभामुख नेम्बाङ्गं संकल्प प्रस्ताव दर्ता यायेगु बारे थः सहमत दुगु तर मेगु दलतलिसे नं सहलह यानाः जक थुकिया निर्णय याये धयादीगु खः । संवैधानिक व्यवस्था कथं संकल्प प्रस्ताव दर्ता यायेत सभामुखया स्वीकृति माः ।
माओवादी बाहेक मेगु राजनीतिक पार्टीतय्सं धाःसा सदनय् संकल्प प्रस्ताव दर्ता याये मजिउ धयाच्वंगुलिं माओवादीं दर्ता याये धाःगु संकल्प प्रस्तावया दर्ता प्रकि्रया छु जुइ धइगु न्ह्यसः ब्वलनाच्वंगु दु ।
उखे सरकार गठनया लागिं तयारी यानाच्वंगु पार्टीतय्सं धाःसा यदि माओवादीं सदन न्ह्याके हे मबिल धाःसा थःपिंसं वैकल्पिक लँपुं जूसां सरकार गठन यायेगु खँ धाःगु दु । नेपाली कांग्रेसया उपसभापति रामचन्द्र पौडेलं साचार माध्यमलिसे खँ ल्हासें थ्व बिचाः प्वंकादीगु खः । फयांफछि माओवादीयात सहमत याकाः सदन दुनं हे सरकार गठन यायेगु कुतः जुइ धासें वय्कलं यदि माओवादी थुकिया नितिं तयार मजुल धाःसा उकिया विकल्प मालाः मेगु लँपुं जूसां सरकार गठनया ज्या यायेमाली धयादिल ।
माओवादीं धाःसा यदि सदन दुने बाहेक अन्य थासं सरकार गठन यात धाःसा उकियात थःपिंसं स्वीकार याये फइ मखु धयाच्वंगु दु ।
थौं हे प्रधानमन्त्री प्रचण्डलिसे नेपाली कांग्रेसया नेता व सभासद् अमरेश कुमार सिंहं नं खँल्हाबल्हा याःगु दु । सिंहयात भारतीय जासुसी संस्था 'र'या नेपाली एजेण्टया रुपय् नं कायेगु याः । उकिं वय्कःपिनि दथुया भेटयात अर्थपूर्ण रुपं कयातःगु दु ।
