निघौ पीकाः नं परराष्ट्रमन्त्री थ्यंकः मवल

येँ(सन्ध्या टाइम्स)/संसदया संसदीय सुनुवाई समितियात निघौ तक पीकाः नं बयान बिउ मवसेंलि उपप्रधान एवं परराष्ट्रमन्त्री उपेन्द्र यादवं संसदया मानहानी याःगु ठहर उगु समितिं याःगु दु।
बंगलादेशय् बहालवाला राजदूत प्रदिप खतिवडाया म्याद अझ हे प्यला ल्यं दनिबलय् न्हूम्ह राजदूत कथं हरिकुमार श्रेष्ठयात छाय् नियुक्त यानागु व राजदूत खतिवडां छ्वया हःगु वैदेशिक भत्ता कर परराष्ट्र मन्त्रालयं छाय् स्वीकार मयानागु धकाः न्यनेगु लागिं सुनुवाई समितिं थौं सुथय् ८ बजे वय्कःयात सःतातःगु खः। तर परराष्ट्र सचिव लगायत समितिया दुजःत निघौ तक पिलं नं वय्कः थ्यंकः मवसेंलि थौंया बैठक स्थगित याःगु खः। लिसें समितिं मन्त्रीया थ्व ज्यां संसदया अपमान जूगु ठहर नं याःगु दु। वय्कःयात आः साउन १ गते बयान बीत हानं सःतूगु दु।