केन्द्रीय बैठक थौं नं स्थगित
येँ (सन्ध्या टाइम्स)/ताः ई लिपा बल्ल थौं च्वनेगु धकाः क्वःछिना तःगु एकीकृत माओवादीया केन्द्रीय बैठक थौं नं अन्तिम इलय् वयाः स्थगित जूगु दु। 'आन्तरिक तयारी मगाःगु' धइगु त्वहःचिनाः थौंया बैठक स्थगित याःगु खःसां थ्व वास्तवय् म्हिगः च्वंगु निम्ह उपाध्यक्षपिनि मंकाः बैठकया हे लिच्वः जुइमाः धकाः सूत्रं धाःगु दु ।
सूत्रं धाः कथं शान्ति व संविधान सम्बन्धी निर्णय न्हापां यायेगु लागिं पार्टीया कार्यविभाजनया ज्या न्हापां यायेगु धइगु खँय् नेतातय्सं निर्णय याये मफुगुलिं थौंया बैठक स्थगित याःगु खः। बैठक कन्हय् च्वनेगु धाःसां च्वनीगु निश्चित मजूगु खँ नं धाःगु दु। थ्व स्वयां न्ह्यः वंगु असार १० गते स्वन्हुया लागिं धकाः केन्द्रीय बैठक स्थगित याःगु खः गुगु थौं तकं च्वने फुगु मदुनि ।
थौंया बैठक च्वने न्ह्यः तयारी यायेत ई मगाःगुलिं बैठक स्थगित यायेमाली धकाः वैद्य पक्षं आग्रह याःगुलिं बैठक लिछ्याःगु खँ धाःगु दु। केन्द्रीय बैठक स्थगित जूसां न्हिनय् २ बजे पोलिटब्युरो बैठक धाःसा च्वनीगु खँ दु ।
बैठक स्थगित जुइवं थःथःगु पक्षया बहुमत खाकेगु लागिं अध्यक्ष प्रचण्ड व निम्ह उपाध्यक्षपिनि थःथःगु तयारी तीव्र गतिं न्ह्याःगु दु। मेम्ह उपाध्यक्ष नारायणकाजी श्रेष्ठ धाःसा आः मध्यमार्गी लँपुं वनेमाली धकाः उकिया हे तयारीपाखे लगे जुयाच्वंगु खँ धाःगु दु ।
प्रचण्ड अल्पमतय् लायेफु
पार्टीया निम्ह उपाध्यक्षपिं मोहन वैद्य (किरण) व डा. बाबुराम भट्टराई पक्षधर नेतातय्सं म्हिगः याःगु मंकाः भेलां शक्तिशाली अध्यक्ष प्रचण्डयात थारा न्हुइका बिउगु दु। माओवादीया केन्द्रीय समितिइ थौंकन्हय् १४८ म्ह दुजः दुसा म्हिगः निम्ह उपाध्यक्षया ६५ म्ह दुजःत छथाय् च्वं वःगु खः। थुकी मेपिं झिम्ह थपे जुल धाःसा केन्द्रीय समितिइ अध्यक्ष प्रचण्ड अल्पमतय् लाः वनी। भट्टराई व वैद्यं महासचिव रामबहादुर थापा (बादल) यात नं थःगु क्याम्पय् हयेधुंकूगु दुसा आः मेम्ह उपाध्यक्ष नारायणकाजी श्रेष्ठयात नं सालेगु कुतः यानाच्वंगु दु। वय्कःपिं सकलें छथाय् च्वन धाःसा प्रचण्ड अल्पमतय् लाइ। वैद्य व भट्टराई जक छथाय् च्वंबलय् अध्यक्ष प्रचण्ड पार्टीया पोलिटब्युरो बैठक व संसदीय दलय् अल्पमतय् लायेधुंकूगु दु ।
