भ्रष्टाचार विरोधी आन्दोलन

कृष्ण प्रजापति

राज्य, राजनीतिक पार्टी व थीथी पेशा ब्यवसायय् सनाच्वंपिं व्यक्ति या समुदायं याइगु भ्रष्टाचारं छगू कथं राष्ट्रयात हे लिउने घ्वाना यंकीगु ला जु हे जुल, उकिया नापनापं विदेशीया न्ह्यःने नं झी लजास्पद जुयाः म्वाये मालीगु स्थिति वयेफु। लँ दयेकेगु खँय् भ्रष्टाचार, ताँ दयेकेगु ज्याय् भ्रष्टाचार व वासः याकेगु थेंज्याःगु मानवीय सेवाया व्यवसायय् तकं भ्रष्टाचार जुयावःगु झी सकसिनं खनागु व ब्वनागु हे विषयत खः। देशय् थज्याःगु भ्रष्टाचार उन्मुलन हे याये मफुसां उकियात नियन्त्रण यायेगु ताः तयाः अख्तियार दुरुपयोगु अनुसन्धान आयोग, राष्ट्रिय सतर्कता केन्द्र लगायत थीथी राज्य स्तरया निकायत नं सक्रिय हे जुयाच्वंगु दु। तर थ्व व्यक्ति विशेषया चरित्रय् निर्भर जुइगु विषय जूगुलिं नं थन थीथी इलय् थीथी कथंया भ्रष्टाचार व अनियमितता जुया वयाच्वंगु दसु झीगु न्ह्यःने दु। थज्याःगु भ्रष्टा चारया कारणं गुलिं देशय् राष्ट्रपति, प्रधानमन्त्री व मन्त्रीतय्सं थःगु बहालवाला पदं हे राजीनामा बीमाःगु स्थिति वःगु दुसा झीथाय् भ्रष्टाचार प्रमाणित जुइधुंकाः नं इमान्दारिता क्यने कथं राजीनामा बीमाः धइगु परिपाटी विकास मजू।
भ्रष्टाचार छगू कथं पुँजीवादी व्यवस्थाया पर्याय कथं न्ह्यःने वयाच्वंगु दु। गन पुँजीया विकास जुइ, पुँजीया चलखेल जुइ व पुँजीपति वर्गं पुँजीयात हे ल्वाभः कथं छ्यलाः गरीब व निमुखा जनताया शोषण व अन्याय यानाच्वनी पाय्छि उगु थासय् भ्रष्टाचार व अनियमिततां अप्वः थाय् कायेगु ह्वःताः चूलाकी। ज्या यानाः ज्याला कयाः उकिया भरय् नयाः म्वायेगु सेवा व्यवसायय् सनाच्वंपिं स्वयां नं ततःधंगु ब्यापार व्यवसाय, बैंक, फाइनान्स कम्पनी व पदया आधारय् ज्या याइगु उच्च निकायय् अप्वः भ्रष्टाचार व अनियमितताया सम्भावना दयाच्वनीगु खः। जुजुं जुजुं झीथाय् आः स्कूल भर्ना यायेत अभिभावकपाखें घूस नकेगु थेंज्याःगु भ्रष्टाचार, उत्कृष्ट विद्यार्थी छम्ह थःगु क्याम्पसय् भर्ना यानाः दुकायेगु निंतिं लाखौं लाखया सुविधा सहुलियत व आवास तकं बन्दोबस्त यानाः मेपिं विद्यार्थीतय्त आकर्षण यायेगु थेंज्याःगु भ्रष्टाचार लगायत नक्कली सामान छ्यलाः सक्कली दां कयाः लँ, धः, ताँ दयेकेगु थेंज्याःगु निर्माण कार्यय् जुइगु भ्रष्टाचार म्हिगः स्वयां थौं व थौं स्वयां कन्हय् अप्वया वनाच्वंगु स्थिति दु।
थज्याःगु भ्रष्टाचार व अनियमितताया आगं प्वलेगु झ्वलय् थौं स्वयां पीनिदँ न्ह्यः ख्वपय् जूगु भ्रष्टाचार विरोधी गतिविधियात थन छक्वः न्ह्यब्वये। २०२५ साल श्रावण २ गते ख्वपय् न्हापांखुसी नीस्वंगु नवदुर्गा बहुमुखी सहकारी संस्थां थःपिनि कार्य समितिया चुनाव यायेगु निंतिं लाय्कुली बचतकर्तातय्त ब्वनातःगु जुयाच्वन। उगु इलय् मंगलेचा धाइम्ह कृष्णभक्त चौगुठी संस्थाया हिरो अध्यक्ष जुयाच्वंगु। थ्व संस्थां बुथुयाके स्वमना, मोहीयाके खुमना अले मोही नं बुथु नं छम्ह हे जुयाच्वंम्ह सुं किसान दत धाःसा वयाके छपीया गुमना ल्याखं वा उठे यानाः बचत संकलन यानातःगु खः। तर उगु बचत लिपा लित बीगु धाधां धाधां थःपिनि व्यक्तिगत स्वार्थ, ब्यापार व्यवसाय सञ्चालन लिसें अनावश्यक खर्च क्यनाः बचत हिनामिना याना नयेगु स्वयेवं स्थानीय किसान न्ह्यलुवात जानाः निर्वाचन हे घाराघुरु यानाबिउगु दिं खः। मतदान याये म्वायेक लाय्कू थेंज्याःगु सार्वजनिक थासय् हे थ्व थ्व मनू त्यात धकाः निर्णय च्वयाः जनताया मिखा छले यानाः चुनाव जूगु व थःपिं त्याःगु नक्कली निर्णय निर्णय पुस्तिकाय् च्वयाः सही यायेगु क्रम जारी जुइवं भ्रष्ट पदाधिकारीतय्त ज्वनाः देय् चाःहीकाः स्थानीय किसानतय्सं कारवाही याःगु दिं खः श्रावण २ गते २०२५।
थज्याःगु घटना पाय्छि दच्छि लिपा हाकनं २०२६ साल असार १९ गते लिसा काल। नवदुर्गा बहुमुखी सहकारी संस्थानं उगु इलय् किसानतय्के बचत कयाः उचित तवरया सहुलियत दरं साः हया बीगु, बुँइ ह्वलेगु किटनाशक विषादी वासःया बन्दोबस्त याना बीगु व बांलाःगु वा पुसा हया बीगु आश्वासन बियातःगु खःसां बुँइ लः टन्न जायेधुंकाः असार १९ गते थ्यने धुंकाः तक नं साः हया मबिउगु जक मखु कि हयातःगु साः तकं थः मनूतय्त जक इनेगु प्रपञ्च यानाः गबलें गन गबलें गन धकाः किसानतय्त दुःख बियाच्वंगुया पलेसा कायेकथं मंगलेचा धाःम्ह उम्ह कृष्णभक्त चौगुठी, विष्णुप्रसाद नेपाली आदि भ्रष्टतय्त स्थानीय किसान न्ह्यलुवातय्सं ज्वनाः, ख्वालय् हाकः पानाः अःखतं तपुलि पुइकाः ख्वप देय् चाःहीकूगु न्हि खः असार १९ गते २०२६। थ्व छगू ल्याखं ऐतिहासिक भ्रष्टाचार विरोधी आन्दोलन खः। आः नं ख्वपय् श्रावण २ व असार १९ गतेयात भ्रष्टाचार विरोधी दिवस कथं हना वयाच्वंगु दु। थज्याःगु भ्रष्टाचार विरोधी आन्दोलनया ताःहाकःगु इतिहास दुगु ख्वप नगरयात अन्तर्राष्ट्रिय जगतं हे 'सदाचारया टापू' धइगु संज्ञा नं बियातःगु दु।
नये मखन कि, अन्याय जुल कि मनूत चिल्लाय् दनाः हालीगु वा थःपिनि हक अधिकार चूलाकेगु निंतिं सीत स्यायेत तयार जुइगु नं स्वाभाविक खः। विश्वय् अज्याःगु अन्याय अत्याचार व भ्रष्टाचार जुइगु कारणं हे ततःधंगु युद्ध व क्रान्तित न्ह्यज्याःगु खः। आः नं संसारय् गुलि नं संघर्षत न्ह्यानाच्वंगु दु थ्व फुक्कं समान वितरण व समान अधिकार मदुगु कारणं हे जक जुयाच्वंगु खः। उकिं झीगु देशय् नं भ्रष्टाचार, अन्याय, अत्याचार व शोषण कायम जुयाच्वंतले थज्याःगु विद्रोहत न्ह्याना हे च्वनीगु कारणं याकनं देशय् शान्ति सुव्यवस्था कायम यायेगु, विकास निर्माणय् ध्यान सालेगु खःसा तमाम जनतायात राजनीतिक, आर्थिक व सामाजिक रुपं विकास यायेगु न्हूगु परिपाटी आरम्भ याये माःगु दु। समाजयात भ्रष्टाचार मुक्त यायेगु कुतः यायेमाः। अले सदाचारया टापू ख्वप जिल्ला जक मखु कन्हय् मुक्कं नेपाः राज्ययात हे याये फइगु सम्भावना दइ। थ्वपाखे देशया जिम्मेवार राजनीतिक पार्टी व राज्यं अप्वः ध्यान तयेमाःगु खनेदु।

More Stories Like this