किरण व भट्टराईया गोप्य मंकाः भेला
येँ(सन्ध्या टाइम्स)/ माओवादी दुने लाइन संघर्ष तच्वया वनाच्वंगु इलय् पार्टीया निम्ह उपाध्यक्षपिं मोहन बैद्य किरण व डा. बाबुराम भट्टराइ पक्षधर नेतातय् मंकाः गोप्य भेला थौं यलय् च्वंगु दु। अनया धोबिघाटया छगू कटेजय् एकीकृत माओवादीया निम्ह उपाध्यक्ष पक्षधर नेतातय्गु भेला याःगु खः। कन्हय् हे जूवनाच्वंगु पार्टीया केन्द्रीय कमिटीया बैठकय् वनेगु नितिं माःगु तयारी यायेत अथे भेला याःगु खः धाःगु दु। उगु भेलाय् महासचिव रामबहादुर थापा बादल तकं उपस्थित जुयादीगु खः। बादल लाइन संघर्षय् दथुइ च्वनाच्वंम्ह नेता खः। अथे हे मन्त्री टोपबहादुर रायमाझी तकं सुविधाया गाडीइ च्वना मवसे निजी गाडीइ च्वनाः बैठकय् ब्वति काः वःगु खः। लिपांगु इलय् वयाः निम्ह उपाध्यक्षपिं किरण व भट्टराई छप्पँ जुया वनाच्वंगुलिं पार्टीया अध्यक्ष प्रचण्डयात झन झन ज्या मछिना वयाच्वंगु खः।
