बलात्कृत भिक्षुणीयात गुम्बां पितनीगु !

येँ(सन्ध्या टाइम्स)/वंगु बाःछि न्ह्यः पूर्वपाखे वनाच्वंबलय् थःहे च्वना वंगु न्याम्ह बसया ड्राइभर व खलासीतपाखें बलात्कारया शिकार जूम्ह बौद्ध भिक्षुणीयात आः थःगु गुम्बां नं भिक्षुपाखें च्युत यानाः निष्काशन यायेगु तयारी जुयाच्वंगु खँ सी दुगु दु।
वय्कःया संस्थां बलात्कार लिपा आः वय्कः 'पवित्र' मजुल धइगु द्वपं बिसें गुम्बां लिकायेगु तयारी यानाच्वंगु खँ वय्कःया छेँजःपिंसं भारतं पिहां वइगु अंग्रेजी न्हिपौ 'टाइम्स अफ इण्डिया'या अनलाइन संस्करणयात धाःगु खः। थौंकन्हय् मानसिक आघातं विक्षिप्त जूम्ह उम्ह भिक्षुणीयात सिलगुडीया छगू अस्पतालय् भर्ना यानाः वासः याकातःगु दु। छेँजःपिंत सुंपाखें नं ग्वाहालि मवःगु व वासः यायां आः तक स्वंगू लाख भारु खर्च जुइधुंकूगु खँ धाःगु दु। तामाङ जातिया उम्ह भिक्षुणी थनिं झिदँ न्ह्यः फम्पिया गुम्बाय् च्वनाच्वंम्ह खः। बलात्कार लिपा मानसिक आघात जुयाच्वंम्ह थः म्ह्याय्यात आः भिक्षुणीपाखें नं निष्काशन याइन धाःगुलिं मांबौपिं चिन्तित जुयाच्वंगु खँ धाःगु दु।