जातीय राज्यया माग यासें प्यथाय् बम

येँ (सन्ध्या टाइम्स)/खम्बुवान स्वायत्त गणराज्य स्थापनाया माग यासें छुं महिना न्ह्यःनिसें भूमिगत जुयाः सशस्त्र विद्रोह यानाच्वंगु छगू पुचलं पूर्वया थीथी प्यंगू थासय् बम तयातःगु लूगु दु ।

खम्बुवान मुक्ति मोर्चा संयुक्त नांया उगु संगठनं धरानया आन्तरिक राजश्व कार्यालय, इटहरीया राजश्व कार्यालय, उदयपुरया जिल्ला विकास समितिया कार्यालय व उदयपुरया हे क्रसर उद्योगय् प्रेसर कुकर बम तयातःगु खः। उदयपुरया तपेश्वरी गाविस वडा नं. ९ लागाय् च्वंगु छगू क्रसर उद्योगय् थौं सुथय् शक्तिशाली प्रेसर कुकर बम लुयावःगु दु ।

प्रहरीं बिउगु जानकारी कथं महादेव एग्रिरकेट प्रालिइ ५ लिटरया प्रेसर कुकर बम लुयावःगु खः। बम दुगु थाय्यात प्रहरीं नियन्त्रणय् कायेधुंकूगु दु। अथे बम तयातःगु थासय् मोर्चाया पर्चा नं लुयावःगु खँ प्रहरीं धाःगु दु। बम तयातःगु प्यंगुलिं हे थासय् प्रहरी वने धुंकूगु दु। मोर्चाया प्रवक्ता धकाः दावी याःम्ह आकार खम्बुं एकात्मक सरकारया अन्त्य यासें आः याकनं हे जातीय ऐतिहासिकताया आधारय् आत्मनिर्णयया अधिकार सहितया खम्बुवान स्वायत्त राज्य स्थापना यायेगु नितिं भूमिगत रुपं सशस्त्र विद्रोह सुरु यानागु खँ न्ह्यथंगु दु। मोर्चा थनिं प्यला न्ह्यः तिनि अस्तित्वय् खने दयावःगु खः ।

बजारय् टाइम बम
सुनसरी सदरमुकाम इनरुवाया नुगःचुइ लाःगु सुपर मार्केटय् तयातःगु बम नेपाली सेनां निष्क्रिय याःगु दु। सुपर मार्केटया निगूगु तल्लाया बाणिज्य बचत तथा ऋण सहकारी संस्था लिमिटेडया लुखाय् टाइम बम तयातःगु खः। चान्हय् साढे १२ बजे उगु बम सेनां निष्क्रिय याःगु खः। तराई लागाय् सशस्त्र संघर्ष याना वयाच्वंगु जनतान्त्रिक तराइ मधेश मुक्ति पार्टीं बम तयागु जिम्मा काःगु दु ।